ប្រជាជនលីទុយអានីត្រូវបានគេរំពឹងថា នឹងដាក់ទណ្ឌកម្មរដ្ឋាភិបាលកណ្តាលស្តាំនិយមរបស់នាយករដ្ឋមន្ត្រី លោកស្រី Ingrida Simonyte នៅក្នុងការបោះឆ្នោតសកល នាថ្ងៃអាទិត្យ (ទី១៣ ខែតុលា) ជុំវិញការកើនឡើងនូវការចំណាយនៃការរស់នៅ គម្លាតទ្រព្យសម្បត្តិ និងសេវាសាធារណៈកាន់តែយ៉ាប់យ៉ឺន ខណៈពេលដែលបញ្ជាក់សារជាថ្មីនូវការគាំទ្ររបស់ពួកគេ ចំពោះការចំណាយខ្ពស់លើវិស័យការពារជាតិ ដើម្បីទប់ទល់នឹងការគំរាមកំហែងដែលអាចកើតមានពីប្រទេសរុស្ស៊ី។

ការស្ទង់មតិបង្ហាញថា គណបក្សសង្គមប្រជាធិបតេយ្យ ដែលជាអតីតបក្សកុម្មុយនីស្ត លោកស្រី Vilija Blinkeviciute វ័យ ៥៤ឆ្នាំ នាំមុខប្រហែល ១៨ភាគរយ ខណៈដែលគណបក្សសហភាពមាតុភូមិរបស់លោកស្រី Simonyte ឈរនៅលេខ៣ ដោយមានសំឡេងគាំទ្រ ៩ភាគរយ។

អតីតរដ្ឋមន្ត្រីក្រសួងហិរញ្ញវត្ថុ និងសារពើពន្ធ លោកស្រី Simonyte វ័យ ៤៩ឆ្នាំ បានធ្វើការឯកភាពគ្នាយ៉ាងទូលំទូលាយ នៅក្នុងប្រទេសបាល់ទិកដែលមានប្រជាជនចំនួន ២,៩លាននាក់ លើតម្រូវការក្នុងការបង្កើនការចំណាយយោធា ចាប់តាំងពីមានការលុកលុយរបស់រុស្ស៊ីលើអ៊ុយក្រែន ក្នុងឆ្នាំ២០២២ ដោយបង្កើនទ្វេដងនៃថវិកាការពារជាតិរបស់ប្រទេស។

តែទោះបីជាយ៉ាងណាក្ដី ដោយអតិផរណាឡើងលើសពី ២០ភាគរយ កាលពី ២ឆ្នាំមុន ដែលជាកម្រិតខ្ពស់បំផុតទី២ នៅក្នុងតំបន់ចាយប្រាក់អឺរ៉ូបន្ទាប់ពីប្រទេសជិតខាងឡាត់វី ការកើនឡើងនូវការចំណាយនៃការរស់នៅ បានធ្វើឲ្យប៉ះពាល់ដល់ប្រជាប្រិយភាពរបស់លោកស្រី៕