មនុស្សយ៉ាងហោចណាស់៨ នាក់បានស្លាប់បន្ទាប់ពីមានភ្លៀងធ្លាក់ខ្លាំងនៅក្នុងប្រទេសប្រេស៊ីល ខណៈព្យុះបានបោកបក់លើតំបន់ជាច្រើនរបស់ប្រទេសនេះ ក្រោយគ្រោះរាំងស្ងួតដ៏ធ្ងន់ធ្ងរដែលបណ្តាលឱ្យមានរលកនៃភ្លើងឆេះព្រៃ ហើយមនុស្សរាប់លាននាក់គ្មានថាមពលអគ្គិសនីប្រើប្រាស់។ 

យោងតាមវិទ្យាស្ថានជាតិឧតុនិយមរបស់ប្រទេសនេះ បានឱ្យដឹងថា ភាគកណ្តាល និងភាគអាគ្នេយ៍នៃប្រទេសប្រេស៊ីល បានរងការវាយប្រហារចាប់តាំងពីថ្ងៃសុក្រ ដោយខ្យល់បក់បោកក្នុងល្បឿន ១០០គីឡូម៉ែត្រក្នុងមួយម៉ោង និងរហូតដល់ ១០ សង់ទីម៉ែត្រនៃកម្រិតទឹកភ្លៀងប្រចាំថ្ងៃ។ 

យោងតាមទីភ្នាក់ងារការពារជនស៊ីវិលរបស់រដ្ឋ មនុស្ស ៧ នាក់បានស្លាប់នៅ Sao Paulo ជារដ្ឋដែលមានប្រជាជនច្រើនបំផុតរបស់ប្រទេសប្រេស៊ីល ភាគច្រើនដោយសារតែការដួលរលំដើមឈើ និងជញ្ជាំង ព្រោះខ្យល់បក់បោកខ្លាំង និងភ្លៀងធ្លាក់ជោគជាំ។ 

ការដាច់ចរន្តអគ្គិសនីបានវាយប្រហារផ្នែកដ៏ធំនៃទីក្រុង Sao Paulo ហើយក្រុមហ៊ុនថាមពល Enel បាននិយាយថាផ្ទះ និងអាជីវកម្មប្រហែល ១,៦ លាន កន្លែងនៅតែគ្មានអគ្គិសនីប្រើប្រាស់។

បញ្ជាការដ្ឋានក្នុងតំបន់បាននិយាយថា នៅក្នុងរដ្ឋធានីប្រាស៊ីលីយ៉ា (Brasilia) ទាហានម្នាក់បានស្លាប់ និងម្នាក់ទៀតរងរបួស បន្ទាប់ពីដើមឈើមួយដើមបានដួលរលំ ខណៈពួកគេកំពុងដកទង់ជាតិនៅមុខទីស្នាក់ការនគរបាលយោធា៕