ទាហានអ៊ីស្រាអែល ៤នាក់បានស្លាប់ និងជាង ៦០នាក់បានរងរបួស ក្នុងការវាយប្រហារដោយយានដ្រូនរបស់ក្រុមហេសបូឡា លើមូលដ្ឋានទ័ពមួយនៅភាគកណ្តាលឆៀងខាងជើងអ៊ីស្រាអែល នេះបើយោងតាមក្រុមអ្នកឆ្លើយតបដំបូង និងយោធាអ៊ីស្រាអែល។

ឧបទ្ទវហេតុកាលពីល្ងាចថ្ងៃអាទិត្យ ម៉ោងក្នុងស្រុក គឺជាការវាយប្រហារមួយក្នុងចំណមការវាយប្រហារដ៏ធំបំផុតជាច្រើនលើអ៊ីស្រាអែល ចាប់តាំងពីការចាប់ផ្តើមសង្រ្គាមកាលពីខែតុលាឆ្នាំមុន។

កងកម្លាំងការពារអ៊ីស្រាអែល (IDF) បាននិយាយថា យានដ្រូន ឬ UAV ដែលបង្ហោះដោយក្រុមហេសបូឡា បានវាយប្រហារមូលដ្ឋានទ័ពនៅជាប់ទីក្រុងប៊ីនយ៉ាមីណា(Binyamina) ដែលជាទីប្រជុំជនមួយស្ថិតនៅភាគខាងជើងទីក្រុង Tel Aviv មានចម្ងាយប្រហែល ៤០ ម៉ាយពីព្រំដែនលីបង់។

កងកម្លាំងIDF បាននិយាយថា ក្រៅពីទាហានបួននាក់ដែលបានស្លាប់ ទាហានប្រាំពីរនាក់ ទៀតបានរងរបួសធ្ងន់ធ្ងរ។

យោងតាមសេវាសង្គ្រោះបន្ទាន់ Magen David Adom របស់អ៊ីស្រាអែល មនុស្សសរុបចំនួន ៦១នាក់បានរងរបួសនៅក្នុងការវាយប្រហារនេះ។

ដំណឹងនេះកើតឡើងបន្ទាប់ពីក្រុមហេសបូឡាបាននិយាយកាលពីថ្ងៃអាទិត្យថា ខ្លួនបានបង្ហោះយានដ្រូនវាយប្រហារលើជំរុំហ្វឹកហ្វឺនទ័ពថ្មើរជើងរបស់អ៊ីស្រាអែលនៅទីក្រុងប៊ីនយ៉ាមីណា ។

ក្រុមសកម្មប្រយុទ្ធដែលមានមូលដ្ឋាននៅលីបង់មួយនេះបាននិយាយថា ការវាយប្រហារនេះគឺដើម្បីឆ្លើយតបទៅនឹងការវាយប្រហាររបស់អ៊ីស្រាអែលនៅក្នុងប្រទេសលីបង់កាលពីថ្ងៃព្រហស្បតិ៍សម្លាប់មនុស្ស ២២ នាក់និងរបួស ១១៧នាក់ ៕