​បាល់ទាត់៖ ​ទីបំផុត​ចិន​ស្គាល់​ជ័យជំនះ​ដំបូង​របស់ខ្លួន​ហើយ​ក្នុងការ​ប្រកួត​វគ្គ​ជំ​រុះ World Cup តំបន់​អាស៊ី​ជុំ​ទី៣ ក្រោយ​យកឈ្នះ​វៀតណាម​ប្រផិតប្រផើយ​នៅ​ចុង​ម៉ោង​។ ​បន្ទាប់ពី​ចាញ់​ពីរ​ប្រកួត​ដំបូង​ដែល​រួមមាន​ចាញ់​អូស្ត្រាលី និង​ជប៉ុន ក្រុម​ចិន​បាន​នាំមុខ​ទៅលើ​វៀតណាម ២​គ្រាប់​មុន​ដោយ Zhang Yunning និង​ខ្សែប្រយុទ្ធ​ក្លិប​អេ​ស្ប៉ា​ញ Espanyol, Wu Lei​។

​​តែ​ក្រុម​វៀតណាម​ថ្វីបើ​នៅ​សល់​តែ ១០​នាទី​ទៀត​ចប់​ការប្រកួត​ក៏​រក​បាន​ ២​គ្រាប់​មកវិញ​តាម​ស្មើ​ដោយ Ho Tan Tai នាទី​ទី៨០ និង Nguyen Tien Linh នាទី​ទី​៩០​។ ​ម៉ោង​បន្ថែម​បង្គ្រប់​ចំនួន ៥​នាទីឈាន​ដល់​នាទី​ទី​៩០+៥ ទៅ​ហើយ​ចិន​ក៏​រក​បាន​គ្រាប់​ជ័យជំនះ​ដោយ Wu Lei ដដែល​។ ​នេះ​ជា​ជ័យជំនះ​ដំបូង​របស់​ចិន​ក្នុង​ពូ​ល B នៃ​ជុំ​ទី​៣ នេះ​តែ​ពួកគេ​នៅ​ឈរ​លេខ​៥ មាន ៣​ពិន្ទុ​ពីលើ​វៀតណាម​ជា​ក្រុម​តែ​មួយ​គត់​ក្នុង​ពូ​ល​នេះ​ដែល​មិន​ទាន់​មាន​ពិន្ទុ​។ ​​ងាក​មក​ជប៉ុន​វិញបាន​ស្គាល់​បរាជ័យ​លើក​ទី២ ក្នុងចំណោម ៣ប្រកួត​របស់ខ្លួន​បន្ទា​ប់​ពី​ចាញ់​នៅ​ទឹកដី​អារ៉ាប៊ីសាអ៊ូឌីត ១-០​។ ​មួយ​គ្រាប់​ជ័យជំនះ​សំរេចបាន​ដោយ Firas Al-Buraikan នៅ​នាទី​ទី៧១​។ ​ជប៉ុន​កំពុង​ឈរ​លេខ៣ ក្នុង​ពូ​ល​នៅពេលនេះ​មាន ៣ពិន្ទុ​ស្មើគ្នា​ជាមួយ​ក្រុម​លេខ៤ អូ​ម៉​ង់​។

​​ចំណែក​អារ៉ាប៊ីសាអ៊ូឌីត​នៅតែ​បន្ត​ឥតខ្ចោះ​ក្នុង​ពូ​ល B នេះ​ក្រោយ​មាន ៩ពិន្ទុ​ពេញ​ដូចគ្នា​នឹង​អូស្ត្រាលី​ដែល​បាន​យកឈ្នះ​អូ​ម៉​ង់ ៣-១​។ ​បី​គ្រាប់​របស់​អូស្ត្រាលី​សំរេចបាន​ដោយ Awer Bul Mabil, Callie Boyle និង Thomas Duke​។ ​ប្រកួត​បន្ទាប់​ថ្ងៃទី១២ នេះជប៉ុន​ជួប​អូស្ត្រាលី, អារ៉ាប៊ីសាអ៊ូឌីត​ជួប​ចិន និង​អូ​ម៉​ង់​ជួប​វៀតណាម​៕

​អត្ថបទ​៖​នាង សុភា​វុ​ធ