​បាល់ទាត់៖ ​ក្រុម​អ៊ីរ៉ង់​បាន​បន្ត​ស្ថិតិ​ឈ្នះ ១០០% របស់ខ្លួន​ក្នុងការ​ប្រកួត​ជំ​រុះ World Cup តំបន់​អាស៊ី​ជុំ​ទី៣ ក្នុង​ពូ​ល A នេះក្រោយ​យកឈ្នះ​នៅ​ទឹកដី​អារ៉ាប់​រួម ១-០ យប់មិញ​។ ​គ្រាប់​បាល់​ជ័យជំនះ​របស់​អ៊ីរ៉ង់​ធ្វើបាន​ដោយ​ខ្សែប្រយុទ្ធ Porto, Mehdi Taremi នៅ​នាទី​ទី​៧០ ដែល​ធ្វើ​ឱ្យ​ក្រុម​របស់លោក Dragan Skocic បន្ត​គ្រប់គ្រង​ពូ​ល A នេះ​ដដែល​មាន ៩​ពិន្ទុ​ពេញ​ក្រោយ​ឈ្នះ​ទាំង ៣​ប្រកួត​។​

​​ចំណែក​អារ៉ាប់​រួម​ក្រោម​ការដឹក​នា​របស់លោក Bert wan Marwijk អតីត​គ្រូបង្វឹក​ក្រុម​ជំរើសជាតិ​ហូ​ឡង់​នោះ​មាន​ត្រឹម ២ពិន្ទុ​ប៉ុណ្ណោះ​ឈរ​លេខ៣ ស្មើគ្នា​ជាមួយ​លី​បង់ និង​អ៊ីរ៉ាក់​។​ ​អ៊ីរ៉ាក់​ជួបគ្នា​ជាមួយ​លី​បង់​យប់មិញ​នៅ​ទីក្រុង​ដូ​ហា​ប្រទេស​កាតា​បញ្ចប់​ត្រឹម​លទ្ធផល​ស្មើគ្នា ០-០​។ ​ចំណែក​មួយគូ​ទៀត​ក្រុម​កូរ៉េខាងត្បូង​បាន​យកឈ្នះ​ស៊ី​រី ២-១ ដើម្បី​បន្ត​ដេញតាម​ក្រុម​កំពូល​តារាង​អ៊ីរ៉ង់​។​ ​Hwang In-beom ជា​អ្នកបើក​ការនាំ​មុខមុន​ឱ្យ​កូរ៉េ​នៅ​នាទី​ទី៤៧ មុនពេល​ដែល​ស៊ី​រី​តាម​ស្មើ​វិញ​នៅ​នាទី​ទី​៨៣ ដោយ Omar Kharbin​។​

​​គ្រាប់​ជ័យជំនះ​របស់​កូរ៉េ​ត្រូវបាន​សំរេច​ដោយ​ខ្សែប្រយុទ្ធ Spurs, Heung-min Son នៅ​នាទី​ទី៨៨​។ ​បី​ពិន្ទុ​នេះ​កូរ៉េ​បន្ត​ឈរ​លេខ២ ក្នុង​ពូ​ល A នេះ​ដេញ​ពីក្រោយ​ក្រុម​កំពូល​តារាង​អ៊ីរ៉ង់ ២ពិន្ទុ​។ ​ប្រកួត​បន្ទាប់​នៅ​ថ្ងៃទី១២ អ៊ីរ៉ង់​ទទួល​កូរ៉េ, អារ៉ាប់​រួម​ទទួល​អ៊ីរ៉ាក់ និង​ស៊ី​រី​ជួប​លី​បង់​៕

​អត្ថបទ​៖​នាង សុភា​វុ​ធ