ពលរដ្ឋខ្មែរចងចាំមិនភ្លេចស្នាព្រះហស្ដ ព្រះបរមរតនកោដ្ឋ ព្រះបាទ នរោត្តម សីហនុ ព្រះមហា​វីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ។ បើគិតត្រឹមថ្ងៃទី១៥ ខែតុលាស្អែកនេះ គឺជាខួប១២ព្រះវស្សា (១៥ តុលា ២០១២-១៥ តុលា ២០២៤) នៃ​ការ​យាង​ចូល​ព្រះទិវង្គត ព្រះបរមរតនកោដ្ឋ។

ពលរដ្ឋរស់នៅក្នុងរាជធានីភ្នំពេញ នៅថ្ងៃទី១៤ ខែតុលានេះ បានប្រាប់BTVឱ្យដឹងថា ក្នុងនាម​ប្រជា​ពលរដ្ឋខ្មែរកើតទាន់សម័យព្រះបរមរតនកោដ្ឋ ព្រះបាទ នរោត្តម សីហនុ គ្រប់គ្រង​ប្រទេស​ជាតិ នាសម័យកាលនោះ បានធ្វើឱ្យប្រទេសជាតិមានការអភិវឌ្ឍរីកចម្រើនគ្រប់វិស័យ។ លើស​ពី​នេះ ប្រជាពលដ្ឋបានបង្ហាញការចងចាំមិនភ្លេចស្នាព្រះហស្ដ ដែលាមានជាច្រើន ជាជាពិសេស គុណូបការៈ ថ្ងៃរំដោះប្រទេសកម្ពុជាពីអាណានិគមបារាំង ៩ វិច្ឆិកា ១៩៥៣។

ព្រះករុណា ព្រះបាទ សម្ដេច ព្រះនរោត្ដម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណ ភាពទឹកដី និងឯកភាពជាតិខ្មែរ ប្រសូតនៅទី៣១ ខែតុលា ឆ្នាំ១៩២២ ស្ថិតនៅ​ក្នុង​រាជ​ធានី​ភ្នំពេញ​។ ទ្រង់យាងចូលទិវង្គត នៅថ្ងៃទី១៥ ខែតុលា ឆ្នាំ២០១២ ស្ថិតនៅទីក្រុងប៉េកាំង ប្រទេស​ចិន ដោយព្រះជរាពាធ ក្នុងជន្មាយុ៩០ព្រះវស្សា។

ចំពោះស្នាព្រះហស្ដ ព្រះអង្គបន្សល់ទុកដល់កូនចៅជំនាន់ក្រោយ មានជាច្រើន​ដែល​ក្នុង​នោះ​រួមមាន​៖ ទាមទារឯក រាជ្យពីអាណានិគមបារាំងជូនជាតិមាតុភូមិ, ទាមទារប្រាសាទ​ព្រះវិហារ​ពី​ប្រទេស​ថៃ, បង្កើតសមិទ្ធផលជា ច្រើននៅក្នុងសម័យសង្គមរាស្រ្តនិយម, សាងសង់វិមាន​ឯករាជ្យ​ភ្នំពេញ, បង្កើតមន្ទីរពេទ្យមិត្តភាពខ្មែរ-សូវៀត និងកសាងពហុកីឡដ្ឋានជាតិអូឡាំពិកជាដើម៕ អត្ថបទ៖ ទូច សោភ័ណ