ប្រទេសកូរ៉េខាងជើងនៅថ្ងៃចន្ទនេះ បានថ្កោលទោសបេសកជនសិទ្ធិមនុស្សរបស់សហរដ្ឋអាមេរិក ដោយបានសង្កត់ធ្ងន់ថា ការហូរចូលនៃព័ត៌មានពីខាងក្រៅទៅកាន់ប្រទេសកូរ៉េខាងជើង គឺជាធាតុសំខាន់នៃគោលនយោបាយរបស់ទីក្រុងវ៉ាស៊ីនតោនចំពោះកូរ៉េខាងជើង ដោយអះអាងថា សហរដ្ឋអាមេរិក មានគោលបំណង ធ្វើឲ្យប្រព័ន្ធរបស់ខាងជើងដួលរលំ។

បេសកជនពិសេសរបស់សហរដ្ឋអាមេរិកទទួលបន្ទុកបញ្ហាសិទ្ធិមនុស្សកូរ៉េខាងជើង លោកស្រី Julie Turner និងឯកអគ្គរដ្ឋទូតទទួលបន្ទុកបេសកកម្មពិសេសសម្រាប់យុត្តិធម៌ឧក្រិដ្ឋកម្មសកល លោក Beth Van Schaack បានទៅបំពេញទស្សនកិច្ចនៅកូរ៉េខាងត្បូងកាលពីសប្តាហ៍មុន និងបានជួបជាមួយមន្ត្រីរដ្ឋាភិបាលសំខាន់ៗ ដើម្បីពិភាក្សាអំពីវិធីកែលម្អស្ថានភាពសិទ្ធិមនុស្សរបស់កូរ៉េខាងជើង។

កូរ៉េខាងជើង បាននិយាយថា គោលដៅរបស់ទីក្រុងវ៉ាស៊ីនតោន គឺដើម្បីផ្តួលរំលំប្រព័ន្ធមនោគមន៍វិជ្ជា និងប្រព័ន្ធសង្គមរបស់កូរ៉េខាងជើង ដោយសំអាងលើការអត្ថាធិប្បាយរបស់លោកស្រី Turner ដែលថា ការហូរចូលនៃព័ត៌មានខាងក្រៅទៅកាន់ប្រទេសកូរ៉េខាងជើង និងការផ្សព្វផ្សាយសាសនានៅកូរ៉េខាងជើង គឺជា «សសរស្តម្ភស្នូល»នៃគោលនយោបាយរបស់សហរដ្ឋអាមេរិកចំពោះកូរ៉េខាងជើង។ នេះបើយោងតាមទីភ្នាក់ងារសារព័ត៌មានមជ្ឈិមកូរ៉េ (KCNA)។

សារព័ត៌មាន KCNA បាននិយាយថា៖«សហរដ្ឋអាមេរិក គួរតែដឹងថា ផែនការសិទ្ធិមនុស្សដែលគ្មានប្រយោជន៍របស់ខ្លួន នឹងគ្រាន់តែគូសបញ្ជាក់បន្ថែមនូវលក្ខណៈពិតនៃគោលនយោបាយ «ការរំសាយអាវុធនុយក្លេអ៊ែរ»របស់ខ្លួន ដែលបានបញ្ចប់ក្នុងស្ថានភាពជាក់ស្តែងនោះ»។

កូរ៉េខាងជើង បានព្រមានថា ខ្លួននឹងលុបបំបាត់រាល់អ្វីដែលបង្កការគំរាមកំហែងដល់អធិបតេយ្យភាពរបស់ខ្លួន ដោយប្តេជ្ញាចាត់វិធានការការពារសិទ្ធិ និងផលប្រយោជន៍ ឲ្យបានកម្រិតអតិបរមា។