លោក Donald Trump កាលពីថ្ងៃអាទិត្យ (ទី១៣ ខែតុលា) បានចេញការគំរាមកំហែងទាក់ទងនឹងការបោះឆ្នោតដ៏អាក្រក់ ចំពោះពួកឆ្វេងនិយម «ជ្រុល» ដោយនិយាយថា លោកអាចគាំទ្រកម្លាំងយោធារបស់សហរដ្ឋអាមេរិក ប្រឆាំងនឹងជនជាតិអាមេរិកដែលលោកបានពិពណ៌នាថាជា «សត្រូវខាងក្នុង« ប្រសិនបើពួកគេរំខានដល់ការបោះឆ្នោត នៅក្នុងខែវិច្ឆិកា។

ដោយសំដៅទៅលើពលរដ្ឋអាមេរិកជាអ្នកបង្កបញ្ហាជាងជនអន្តោរប្រវេសន៍ដែលលោករិះគន់ថា បានធ្វើដំណើរមកពាសពេញប្រទេសរបស់លោកនោះ លោក Trump បានប្រាប់ទូរទស្សន៍ Fox News ក្នុងកម្មវិធី Sunday Morning Futures ថា៖ «ខ្ញុំគិតថា បញ្ហាធំជាងគេ គឺសត្រូវពីខាងក្នុង ពោលគឺធំជាងសូម្បីតែប្រជាជនដែលចូលមកបំផ្លាញប្រទេសរបស់យើង»។

លោក Trump បាននិយាយថា៖ «ប្រទេសយើងមានមនុស្សអាក្រក់មួយចំនួន ប្រទេសយើងមានមនុស្សបង្កគ្រោះថ្នាក់មួយចំនួន គឺពួកមិនគិតអ្វីសោះដែលមាននិន្នាការឆ្វេងនិយមជ្រុលស។ ប្រសិនបើចាំបាច់ ងាយៗ ពួកគេគួរតែត្រូវបានដោះស្រាយដោយឆ្មាំជាតិ ឬប្រសិនបើពិតជាចាំបាច់ខ្លាំង ត្រូវដោះស្រាយដោយយោធាតែម្ដង។ ព្រោះពួកគេមិនអាចបណ្ដោយឲ្យបញ្ហាធ្ងន់ធ្ងរកើតឡើងបានឡើយ»។

អតីតប្រធានាធិបតីរបស់គណបក្សសាធារណរដ្ឋ កំពុងឆ្លើយតបទៅនឹងសំណួរអំពីអ្វីដែលលោករំពឹងថា នឹងកើតមានឡើងនៅថ្ងៃបោះឆ្នោត បន្ទាប់ពីប្រធានាធិបតីអាមេរិក លោក Joe Biden បាននិយាយកាលពីសប្តាហ៍មុនថា ខណៈដែលលោកជឿថា ការបោះឆ្នោតនឹងប្រព្រឹត្តទៅដោយសេរី និងយុត្តិធម៌នោះ លោកក៏មិនដឹងថា «តើថ្ងៃនោះនឹងដំណើរការទៅដោយស្ងប់ស្ងាត់ដែរ ឬយ៉ាងណា»។

លោក Trump បានអះអាងក្នុងសុន្ទរកថារបស់លោកថា ពលរដ្ឋអាមេរិកាំង គឺ «គ្រោះថ្នាក់ជាងប្រទេសចិន រុស្ស៊ី និងប្រទេសទាំងអស់នេះ»៕