​បាល់ទាត់៖ ​មន្ត្រី​អាជ្ញាកណ្តាល​ជា​ស្ត្រី​ទាំង ​៤​នាក់​នឹង​ដឹកនាំ​ការប្រកួត​ជំ​រុះ World Cup តំបន់​អឺរ៉ុប​រវាង​អង់​ដូ​រ៉ា និង​អង់គ្លេស​នៅ​យប់​ថ្ងៃ​សៅរ៍​នេះ​។​ ​លោកស្រី Kateryna Monzul នឹង​ជាម​ន្ត្រី​អាជ្ញា​កណ្តាល​ដឹកនាំ​ការប្រកួត​នៅ​លើ​ទីលាន ខណៈ​មិត្ត​រួម​ជាតិ​អ៊ុយ​ក្រែ​ន​រួមមាន Maryna Striletska និង Svitlana Grushko ជា​ជំនួយការ​អាជ្ញាកណ្តាល​លើ​ខ្សែបន្ទាត់​ទាំងសងខាង​។

​​ចំណែក​លោក Stephanie Frappart សញ្ជាតិ​បារាំង​គឺជា​អ្នកគ្រប់គ្រង​វីដេអូ​ជំនួយ​អាជ្ញា​កណ្តាល​រឺ​ហៅថា VAR​។​ ​ការប្រកួត​នៅ​យប់​ថ្ងៃ​សៅរ៍​នេះ​នឹង​ជា​ការ​ប្រកួត​ដំបូង​របស់​អង់គ្លេស ដែល​មាន​អាជ្ញា​កណ្តាល​ដឹកនាំ​ការប្រកួត​ជា​ស្ត្រី​ទាំង​ ៤នាក់​បែបនេះ​។​ ​ចំណែក​មន្ត្រី​ជា​បុរស​ ២នាក់​ផ្សេងទៀត​នឹង​ជំនួយការ ស្រប​ពេល​លោក Denys Shurman ជា​មន្ត្រី​ទី​បួន និង​លោក Viktor Matyash ជា​ជំនួយការ VAR​។ សូមបញ្ជាក់ថា​ លោកស្រី Kateryna Monzul ធ្លាប់​បាន​ដឹកនាំ​ការប្រកួត​បុរស​នៅ​ពាន​រង្វាន់ UEFA Nations League រវាង​សាន់​ម៉ា​រី​ណូ និង​ហ្ស៊ី​ប្រា​ល់តា​ឆ្នាំមុន​។ ​កាលពី​ឆ្នាំ​២០១៦ លោកស្រី Monzul បាន​ក្លាយ​ជា​អាជ្ញា​កណ្តាល​ស្ត្រី​ដំបូង​ដឹកនាំ​ការប្រកួត​ផ្នែក​បុរស​នៅ​លី​គ​កំពូល​អ៊ុយ​ក្រែ​ន ហើយ​ក្រោយមក​ក៏បាន​ដឹកនាំ​ការប្រកួត​បាល់ទាត់​នារី World Cup និង Euro ផងដែរ​៕

​អត្ថបទ​៖​នាង សុភា​វុ​ធ