កាលពីថ្ងៃអាទិត្យម្សិលមិញ ប្រធានាធិបតីសហរដ្ឋអាមេរិកលោក Joe Biden បានបំពេញទស្សនកិច្ចទៅកាន់តំបន់រងផលប៉ះពាល់ដោយសារព្យុះសង្ឃរានៅទីក្រុង St. Petersburg រដ្ឋ Florida ហើយលោកបានជួបជាមួយអ្នករស់រាន និងស្ទង់ផលប៉ះពាល់បណ្តាលមកពីព្យុះសង្ឃរា Milton កាលពីសប្តាហ៍មុន ។

 ព្យុះ Milton បានឆក់យកអាយុជីវិតមនុស្ស ១៧នាក់ និងជាព្យុះដ៏ខ្លាំងក្លាទី ២ បានវាយប្រហាររដ្ឋតំបន់ឆ្នេរ Florida ក្នុងរយៈពេល ២សប្តាហ៍ ។

 លោកនិយាយថា សាច់ញាតិទាំងអស់នេះ មិនត្រឹមតែបាត់បង់ផ្ទះសម្បែងរបស់ពួកគេទេ ពួកគេបាត់បង់អាយុជីវិត បាត់បង់សមាជិកគ្រួសារ បាត់បង់ទ្រព្យសម្បត្តិផ្ទាល់ខ្លួនរបស់ពួកគេ ។ សហគមន៍ទាំងមូល បានជន់លិច មនុស្សរាប់លាននាក់ គ្មានចរន្តអគ្គិសនីប្រើប្រាស់ ។

 លោកបន្តថា គ្រោះមហន្តរាយបែបនេះ មានតែការអំពាវនាវឲ្យមានការរួបរួមគ្នាប៉ុណ្ណោះ ។

 បើទោះបីជាព្យុះ Milton មិនបណ្តាលឲ្យរងការខូចខាតដូចក្រុមមន្រី្តព្យាករណ៍ដំបូង ក្រុមអ្នកវិភាគប៉ាន់ប្រមាណពីការខូចខាតចន្លោះពី ៣០ពាន់លានដុល្លារ និង ៦០ពាន់លានដុល្លារ ។

 រដ្ឋបាលរបស់លោក Biden បានអនុម័តជំនួយសហព័ន្ធ ដើម្បីជួយដល់អ្នកស្រុក ហើយរដ្ឋាភិបាលក្នុងស្រុកជាអ្នករ៉ាប់រងការចំណាយ ប៉ុន្តែលោកនិយាយថា ទីភ្នាក់ងារគ្រប់គ្រងគ្រាអាសន្នសហព័ន្ធ ត្រូវការមូលនិធិបន្ថែមទៀតពីសភាសហរដ្ឋអាមេរិក បើទោះបីជាបច្ចុប្បន្នវាគ្រប់គ្រាន់ឈានដល់តម្រូវការព្យុះបន្ទាន់ក៏ដោយ ៕