អារ៉ាប៊ីសាអូឌីត បាននិយាយនៅថ្ងៃចន្ទនេះថា ពួកគេគ្រោងនឹងបញ្ជូនជំនួយមនុស្សធម៌ចន្លោះពី ៦០តោន និង ៨០តោនទៅកាន់ប្រទេសលីបង់ជារៀងរាល់ថ្ងៃ ។

យោងតាមការអះអាងរបស់លោកវេជ្ជបណ្ឌិត Salmer Albosairi គឺជាអ្នកនំាពាក្យរបស់មន្ទីរជួយសង្រ្គោះ និងជំនួយមនុស្សធម៌ព្រះមហាក្សត្រ Salman បានឲ្យដឹងថា គោលដៅរបស់រាជាណាចក្រមួយនេះ គឺដើម្បីសង្រ្គោះជីវិតមនុស្ស ការពារជីវិតអ្នកដែលរត់ភៀសខ្លួន ធ្វើឲ្យល្អប្រសើរឡើងគុណភាពជីវិតមនុស្សសម្រាប់ពលរដ្ឋលីបង់ជម្លៀសខ្លួនក្នុងប្រទេស ។

លោក Salmer និយាយថា គ្មានដែនកំណត់នោះទេសម្រាប់ជំនួយរបស់ពួកយើង ដែលនឹងបញ្ជូនទៅកាន់ប្រទេសលីបង់ ។ 

ជម្លោះរវាងអ៊ីស្រាអែល និងក្រុមហេសបូឡា បានផ្ទុះឡើងកាលពីរយៈពេល ១ឆ្នាំមុន ពេលដែលក្រុមជីវពលគាំទ្រដោយអ៊ីរ៉ង់មួយនេះ ផ្លោងគ្រាប់រ៉ុក្កែតលើទីតាំងឈរជើងរបស់អ៊ីស្រាអែល ជាការគាំទ្រក្រុមហាម៉ាស់ ពេលចាប់ផ្តើមសង្រ្គាមហ្កាហ្សា ហើយជម្លោះមួយនេះ បានឡើងកម្តៅខ្លាំង ក្នុងរយៈពេលប៉ុន្មានសប្តាហ៍ចុងក្រោយនេះ ។

ក្រសួងសុខាភិបាលលីបង់ និយាយកាលពីថ្ងៃសៅរ៍ចុងសប្តាហ៍មុនថា គិតត្រឹមថ្ងៃសុក្រ ចំនួនមនុស្សស្លាប់សរុបនៅលីបង់កើនឡើងដល់ ២.២៥៥នាក់ ចាប់តាំងពីជម្លោះបានកើតឡើង ។

ការិយាល័យសម្របសម្រួលកិច្ចការមនុស្សធម៌អង្គការសហប្រជាជាតិ(UN) និយាយថា បច្ចុប្បន្នពលរដ្ឋលីបង់ បានជម្លៀសខ្លួនច្រើនជាងអំឡុងសង្រ្គាមធំចុងក្រោយបង្អស់រវាងអ៊ីស្រាអែល និងក្រុមហេសបូឡា កាលពីឆ្នាំ ២០០៦ ជាពេលដែលមនុស្សប្រហែល ១លាននាក់ បានរត់ភៀសខ្លួនចេញពីផ្ទះសម្បែងរបស់ពួកគេ ៕