លោកស្រី គីម យ៉ូ ចុង (Kim Yo Jong) ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានព្រមានទីក្រុងសេអ៊ូលមិនឲ្យការបញ្ជូនយានដ្រូនទៅកូរ៉េខាងជើងទៀតទេ ហើយថា ការព្រមាននេះ មិនមិនគ្រាន់តែជាវោហាស័ព្ទស្ត្រនយោបាយទេ។

ទីភ្នាក់ងារព័ត៌មានមជ្ឈិមកូរ៉េ (KCNA) បានដកស្រង់សម្តីរបស់លោកស្រីថា៖«វាហាក់ដូចជាថា ក្រុមឧក្រិដ្ឋជន នៅទីក្រុងសេអ៊ូល នៅតែមិនយល់ពីស្ថានភាព ហើយគិតខុសថា នេះគ្រាន់តែជា «សង្រ្គាមពាក្យសម្តី"» ហើយបន្តការនិយាយគំរាមប៉ុណ្ណោះ»។

លោកស្រី បានបន្ថែមថា៖«ក្រុមឧក្រិដ្ឋជនយោធាកូរ៉េខាងត្បូង ត្រូវតែចៀសវាងពីការប្រថុយនឹងគ្រោះថ្នាក់ដ៏ធ្ងន់ធ្ងរនិងខ្វះការពិចារណានោះ។ ពួកគេ ត្រូវការធានាភ្លាមៗថា ការញុះញង់បង្កហេតុចូលទៅក្នុងដែនអាកាសនៃប្រទេសមួយផ្សេងទៀត នឹងមិនកើតឡើងម្តងទៀតទេ»។

ក្រសួងការបរទេសកូរ៉េខាងជើងកាលពីថ្ងៃសុក្រ បានទាមទារឲ្យទីក្រុងសេអ៊ូល បញ្ឈប់ការបញ្ជូនយានដ្រូន ទៅកាន់ប្រទេសកូរ៉េខាងជើង។ យោងតាមក្រសួងនេះ យានដ្រូនរបស់កូរ៉េខាងត្បូង បានឆ្លងចូលទៅក្នុងប្រទេសកូរ៉េខាងជើងចំនួនបីដង ក្នុងអំឡុងខែតុលា ដើម្បីពង្រាយខិត្តប័ណ្ណឃោសនា។ ទីក្រុងព្យុងយ៉ាងបានព្រមានថា យោធារបស់ខ្លួន នឹងដាក់«សព្វាវុធវាយលុក»ប្រុងជើងការជាស្រេច ដើម្បី«បំផ្លាញហេដ្ឋារចនាសម្ព័ន្ធយោធា នៅជិតព្រំដែនភាគខាងត្បូង ក្នុងទឹកដីនៃសាធារណរដ្ឋកូរ៉េ»។

យោធាកូរ៉េខាងត្បូង បាននិយាយកាលពីថ្ងៃទី ១៣ ខែតុលាថា កូរ៉េខាងជើង នឹង «មើលឃើញរបបរបស់ខ្លួនត្រូវបញ្ចប់ ប្រសិនបើប្រទេសនេះ គំរាមកំហែងដល់សន្តិសុខរបស់កូរ៉េខាងត្បូង។ យោងតាមលោក Shin Won-sik ទីប្រឹក្សាសន្តិសុខជាតិរបស់កូរ៉េខាងត្បូង ជម្លោះប្រដាប់អាវុធជាមួយកូរ៉េខាងត្បូង នឹងក្លាយជាអត្តឃាតមួយសម្រាប់ទីក្រុងព្យុងយ៉ាង។