​ថៃ៖ ភោជនីយដ្ឋាន​មួយ​ដែល​រងគ្រោះ​ដោយ​ទឹកជំនន់​នៅ​ក្នុង​ប្រទេស​ថៃ ​បាន​ក្លាយ​ជា​កន្លែង​ទទួល​ទាន​អាហារ​ចម្លែក​មួយ​បន្ទាប់ពី​ក្រុម​អ្នក​ចូលចិត្ត​រីករាយ​នឹង​ការ​ទទួលទាន​អាហារ​នៅ​ខាងក្រៅ ចាប់ផ្ដើម​សម្រុកចូល​ទៅ​ក្នុង​ភោជនីយដ្ឋានដែល​មាន​ទឹក​លិច​ជម្រៅ​ត្រឹម​ពាក់កណ្ដាល​កៅអី ដើម្បី​ទទួលទាន​អាហារ ខណៈ​ទឹក​ស្រក​ចុះ​។

​ឥឡូវនេះ​ជំនួស​ឱ្យ​កៅអី និង​តុ​ទំនេរ ហាង "Chaopraya Antique Café" កំពុង​ផ្តល់​ជូន​នូវ​បទពិសោធន៍​ដ៏​ពេញលេញដែល​ម្ចាស់​ហាង​បាន​ដាក់​យីហោ​ថ្មី​ឈ្មោះថា "hot-pot surfing."​។ ប្រសិនបើ​អ្នក​ចូល​ចិត្ត​ទទួលទាន​អាហារ​រ​នៅ​កណ្ដាល​ទឹក​រលក​នោះ នេះ​គឺជា​កន្លែង​ដ៏​រីករាយ​សម្រាប់​អ្នក​។​ ភ្លាមៗ​បន្ទាប់ពី​ទឹក​ឡើង​លិច​កម្រាល​ក្ដា​ហាង ការ​ទទួល​ទាន​អាហារ​ពេល​ល្ងាច​ដំបូង​បាន​មក​ដល់​។ មិន​យូរ​ប៉ុន្មាន​កម្រាល​ក្ដា​នេះត្រូវ​បាន​ប្រមូល​ផ្តុំ​ដោយ​អតិថិជន​ដែល​គ្មាន​ការ​ខ្វល់ខ្វាយ​នឹង​ទឹកជំនន់ សប្បាយ​រីករាយ​នឹង​ការ​ទទួល​អាហារ​នៅក្នុង​ទឹកជំនន់​។

ភោជនីយដ្ឋាន​នៅ​ក្នុង​ក្រុង Nonthaburi ជិត​រាជធានី​បាងកក​បាន​បើក​ដំណើរការ​កាលពី​ខែ​កុម្ភៈ​នៅ​ក្នុង​ទីតាំង​មាត់ទន្លេ ដែល​បំពេញ​បន្ថែម​យ៉ាង​ល្អឥតខ្ចោះ​នូវ​ស្ថាបត្យកម្ម​បុរាណ និង​ការ​តុប​តែង​របស់​ខ្លួន​។​ ​អតិថិជន​ម្នាក់ លោក Siripoj Wai-int និយាយ​ថា នេះ​គឺជា​បរិយាកាស​ដ៏​អស្ចារ្យ​។ ក្នុងអំឡុងពេល​មាន​វិបត្តិ​ទឹកជំនន់​នេះ​បាន​ក្លាយ​ជា​ការ​ទាក់ទាញ​សម្រាប់​ភោជនីយដ្ឋាន​នេះ។ ដូច្នេះ​ខ្ញុំ​ចង់​ប្រកួត​ប្រជែង​ជាមួយ​ខ្លួនឯង ​និង​សាកល្បង​ទទួលយក​បទពិសោធន៍​ថ្មី​នេះ​៕​

អត្ថបទ៖ សុខមាន