ប្រភពពីនគរបាលបានប្រាប់សារព័ត៌មានថា យ៉ាងហោចណាស់នគរបាល ៣រូប ត្រូវបានសម្លាប់នៅភាគពាយព្យប្រទេសប៉ាគីស្ថាន នៅពេលដែលពួកសកម្មប្រយុទ្ធអ៊ិស្លាមនិយមវាយលុកទីស្នាក់ការប៉ុស្តិ៍នគរបាលស្រុកមួយកន្លែង ក្នុងខេត្ត Khyber Pakhtunkhwa នាថ្ងៃចន្ទ (ទី១៤ ខែតុលា) នេះ។

ប្រភពនគរបាលជាន់ខ្ពស់ បាននិយាយថា ការវាយប្រហារលើបរិវេណដែលមានទាំងទីស្នាក់ការប៉ុស្តិ៍នគរបាលស្រុក និងអគារលំនៅដ្ឋាននោះ កំពុងបន្តមាន ដោយបានបន្ថែមថា អ្នកវាយប្រហារដែលរាប់បញ្ចូលទាំងអ្នកបំផ្ទុះគ្រាប់បែកអត្តឃាតផងដែរ ត្រូវបាន «ឡោមព័ទ្ធ» នៅក្នុងតំបន់នោះ។ លោកបានបញ្ជាក់បន្ថែមថា នគរបាល បានសម្លាប់អ្នកវាយប្រហារ ៣នាក់។

ដោយបាននិយាយក្នុងលក្ខខណ្ឌមិនបញ្ចេញឈ្មោះដោយសារតែភាពរសើបនៃបញ្ហានេះ ប្រភពនោះបាននិយាយថា នគរបាល ៣នាក់ត្រូវបានសម្លាប់ ខណៈពេលដែលទប់ទល់នឹងការវាយលុកទៅលើទីតាំងឈរជើងរបស់នគរបាលស្រុក Bannu ដែលមានព្រំប្រទល់ជាប់នឹងតំបន់របស់កុលសម្ព័ន្ធ North Waziristan តាមបណ្ដោយព្រំដែនប៉ាគីស្ថាន-អាហ្វហ្គានីស្ថាន។

អ្នកនាំពាក្យរបស់ក្រុមសកម្មប្រយុទ្ធអ៊ីស្លាម Tehreek-e-Taliban Pakistan (TTP) បាននិយាយថា ការវាយប្រហារនេះជាស្នាដៃរបស់ក្រុមខ្លួន៕