ប្រធានាធិបតីអ៊ីរ៉ង់ Masoud Pezeshkian និងសមភាគីបារាំងលោក Emmanuel Macron កាលពីថ្ងៃអាទិត្យ បានស្វះស្វែងរកវិធី ដើម្បីបញ្ឈប់ជម្លោះ និងសម្រេចបានបទឈប់បាញ់រវាងក្រុមហេសបូឡានៅប្រទេសលីបង់ និងអ៊ីស្រាអែល។

នៅក្នុងការសន្ទនាតាមទូរស័ព្ទ ភាគីទាំងពីរ បានពិភាក្សាអំពីការវិវឌ្ឍចុងក្រោយបង្អស់ នៅអាស៊ីខាងលិច ជាពិសេសការកើនឡើងភាពតានតឹង នៅក្នុងប្រទេសលីបង់។ នេះបើយោងតាមសេចក្តីថ្លែងការណ៍ដែលបានចេញផ្សាយនៅលើគេហទំព័ររបស់ការិយាល័យប្រធានាធិបតីអ៊ីរ៉ង់។

លោក Pezeshkian បានសង្កត់ធ្ងន់ថា អ៊ីរ៉ង់តែងតែចង់ឲ្យអាស៊ីខាងលិចជាតំបន់ដែលមានសុវត្ថិភាពរួចផុតសង្គ្រាម និងភាពតានតឹង ហើយស្វាគមន៍ចំពោះការបញ្ចប់អរិភាពនានា។

លោកបានបញ្ជាក់ថា អ៊ីរ៉ង់នឹងស្វាគមន៍ និងគាំទ្រចំពោះសំណើណាមួយ ដើម្បីធានាបាននូវភាពស្ងប់ស្ងាត់ សន្តិភាព និងស្ថិរភាពក្នុងតំបន់ ដោយអំពាវនាវឲ្យប្រធានាធិបតីបារាំង រួមជាមួយនឹងមេដឹកនាំរដ្ឋអឺរ៉ុបផ្សេងទៀត បន្តកិច្ចខិតខំប្រឹងប្រែង ដើម្បីបង្ខំអ៊ីស្រាអែលឲ្យបញ្ឈប់ «អំពើប្រល័យពូជសាសន៍ និងឧក្រិដ្ឋកម្ម»របស់ខ្លួន នៅតំបន់ហ្កាហ្សាស្ទ្រីប និងប្រទេសលីបង់។

លោក Pezeshkian ក៏បានសរសើរដល់ការថ្កោលទោសរបស់រដ្ឋាភិបាលបារាំងចំពោះសកម្មភាពរបស់អ៊ីស្រាអែល នៅលីបង់ និងការអំពាវនាវរបស់ខ្លួន ឲ្យបញ្ចប់ការផ្តល់អាវុធដល់អ៊ីស្រាអែល។

សម្រាប់ផ្នែករបស់ខ្លួន លោក Macron បានអំពាវនាវដល់ប្រធានាធិបតីអ៊ីរ៉ង់ឲ្យគាំទ្រ «បន្ធូរបន្ថយភាពតានតឹងជាទូទៅ នៅក្នុងតំបន់ហ្កាហ្សា និងលីបង់ ដោយសង្កត់ធ្ងន់លើការទទួលខុសត្រូវរបស់អ៊ីរ៉ង់ «ក្នុងការប្រើប្រាស់ឥទ្ធិពលរបស់ខ្លួន ក្នុងទិសដៅនេះ ជាមួយតួអង្គបង្កអស្ថិរភាព ដែលពេញចិត្តការគាំទ្ររបស់ខ្លួន»។ នេះបើយោងតាមការិយាល័យរបស់ប្រធានាធិបតីបារាំង។