បណ្ដាមេដឹកនាំសហភាពអឺរ៉ុប (EU) ត្រៀមព្រមានទៅកាន់ហ្សកហ្ស៊ីថា រដ្ឋាភិបាលរបស់ខ្លួនកំពុងបង្កគ្រោះថ្នាក់ដល់ដំណើរផ្លូវឆ្ពោះទៅកាន់ភាពជាសមាជិកពេញសិទ្ធិរបស់ EU នៅមុនការបោះឆ្នោតសភាចុងខែនេះ។ នេះបើយោងតាមសេចក្តីព្រាងអត្ថបទមួយ។

គួរបញ្ជាក់ថា ប្រទេសហ្សកហ្ស៊ីត្រូវបានផ្តល់ឋានៈជាបេក្ខភាពសមាជិកភាពរបស់ EU ក្នុងខែធ្នូ ឆ្នាំ២០២៣ ហើយការស្ទង់មតិបង្ហាញថា ប្រជាជនហ្សកហ្ស៊ីគាំទ្រយ៉ាងទូលំទូលាយ ចំពោះការចូលរួម ក្នុងប្លុកនេះ។

ប៉ុន្តែវោហាសាស្ត្រឈរខាងរុស្ស៊ីកាន់តែខ្លាំងឡើងៗរបស់គណបក្សកាន់អំណាច គឺគណបក្ស Georgian Dream ច្បាប់ដ៏ចម្រូងចម្រាសដែលតម្រូវឲ្យក្រុមដែលទទួលបានមូលនិធិពីបរទេសចុះឈ្មោះជា «ភ្នាក់ងារបរទេស» និងច្បាប់ដែលរារាំងសិទ្ធិអ្នកស្រឡាញ់ភេទដូចគ្នា បានបង្កឲ្យមានការព្រួយបារម្ភ នៅក្នុងបណ្ដារដ្ឋធានីរបស់លោកខាងលិចជាច្រើន។

នៅក្នុងសេចក្តីសន្និដ្ឋានព្រាងដែលត្រូវបានរៀបចំឡើង សម្រាប់កិច្ចប្រជុំកំពូលនៃបណ្ដាមេដឹកនាំសហភាពអឺរ៉ុប នៅទីក្រុងប្រ៊ុចសែល ប្រទេសបែលហ្ស៊ិក នាថ្ងៃទី ១៧-១៨ ខែតុលា ប្លុកនេះ «អះអាងឡើងវិញនូវការត្រៀមខ្លួនរបស់សហភាព ក្នុងការគាំទ្រប្រជាជនហ្សកហ្ស៊ី សម្រាប់ដំណើរផ្លូវឆ្ពោះទៅកាន់ភាពជាសមាជិកពេញសិទ្ធិរបស់អឺរ៉ុប» ប៉ុន្តែក៏ «បញ្ជាក់ឡើងវិញផងដែរនូវការព្រួយបារម្ភយ៉ាងខ្លាំងក្លារបស់ខ្លួនទាក់ទងនឹងដំណើរការនៃវិធានការនានាដែលបានធ្វើឡើងដោយអាជ្ញាធរហ្សកហ្ស៊ី»៕