រដ្ឋអាជ្ញាកំពូលរបស់ប្រទេសអ៊ុយក្រែន បាននិយាយថា លោកបានទទួលព័ត៌មានសម្ងាត់ដែលបង្ហាញថា ប្រធានាធិបតីរុស្ស៊ី លោក វ្ល៉ាឌីមៀ ពូទីន អាចនឹងចូលរួមក្នុងកិច្ចប្រជុំកំពូល G20 នៅក្នុងប្រទេសប្រេស៊ីល នៅខែក្រោយ ហើយបានអំពាវនាវឱ្យអាជ្ញាធរនៅទីនោះ អនុវត្តដីកាសម្រាប់ការចាប់ខ្លួនលោក ប្រសិនបើលោកពូទីន បង្ហាញខ្លួន។

តុលាការព្រហ្មទណ្ឌអន្តរជាតិ (ICC) នៅទីក្រុងឡាអេ បានចេញដីកាសម្រាប់ លោក ពូទីន កាលពីខែមីនាឆ្នាំ ២០២៣ ប្រហែលរយៈពេលមួយឆ្នាំ បន្ទាប់ពីការវាយលុកពេញលេញរបស់រុស្ស៊ីលើអ៊ុយក្រែន ដោយចោទប្រកាន់លោកពីបទឧក្រិដ្ឋកម្មសង្រ្គាមនៃការនិរទេសកុមារ។

រុស្ស៊ី បានច្រានចោលការចោទប្រកាន់ពីបទឧក្រិដ្ឋកម្មសង្រ្គាម ហើយវិមានក្រឹមឡាំង ក៏បានច្រានចោលដីការបស់តុលាការព្រហ្មទណ្ឌអន្តរជាតិ(ICC) ដោយ«ទុកជាមោឃៈ»។ នៅពេលត្រូវបានសួរថាតើលោក ពូទីន នឹងចូលរួមក្នុងកិច្ចប្រជុំរបស់បណ្តាប្រទេសមានសេដ្ឋកិច្ចឈានមុខគេទាំង២០របស់ពិភពលោកដែឬទេ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានកាលពីថ្ងៃចន្ទ ថា «ទេ ប៉ុន្តែនៅពេលដែលការសម្រេចចិត្តត្រូវបានធ្វើឡើង យើងនឹងប្រាប់អ្នកទាំងអស់គ្នាឱ្យដឹង»។

អគ្គរដ្ឋអាជ្ញាប្រទេសអ៊ុយក្រែន លោក Andriy Kostin បានប្រាប់សារព័ត៌មានរ៉យទ័រ ក្នុងបទសម្ភាសន៍ថា «វាមានសារៈសំខាន់សម្រាប់សហគមន៍អន្តរជាតិក្នុងការឈររួបរួម និងនាំយក លោក ពូទីន ឲ្យមកទទួលខុសត្រូវ»។ លោក Kostin បាននិយាយថា ដោយសារតែមាន «ព័ត៌មានថា លោក ពូទីន អាចចូលរួមក្នុងកិច្ចប្រជុំកំពូល G20 នៅប្រទេសប្រេស៊ីល លោកអគ្គរដ្ឋអាជ្ញា បានបញ្ជាក់ជាថ្មីម្តងទៀតថា វាជាកាតព្វកិច្ចសម្រាប់អាជ្ញាធរប្រេស៊ីល ក្នុងនាមជារដ្ឋភាគីនៃសហលក្ខន្តិកៈទីក្រុងរ៉ូម ដើម្បីចាប់ខ្លួន លោក ពូទីន ប្រសិនបើលោកហ៊ាន ទៅធ្វើទស្សនកិច្ចនៅទីនោះ។

ប្រទេសប្រេស៊ីល បានផ្ញើលិខិតអញ្ជើញជាលក្ខណៈស្តង់ដារមួយសម្រាប់ការចូលរួមកិច្ចប្រជុំនៅថ្ងៃទី ១៨ ដល់ថ្ងៃទី១៩ ខែវិច្ឆិកា នៅទីក្រុង Rio de Janeiro នៃក្រុមប្រទេស G20 ប៉ុន្តែពុំបានទទួលការបញ្ជាក់ដែលថា លោក មានផែនការចូលរួមឬយ៉ាងណានោះទេ នេះបើយោងតាមមន្ត្រីរដ្ឋាភិបាលប្រេស៊ីលពីររូប។