ប្រទេសកាណាដា បានបណ្តេញមន្ត្រីការទូតឥណ្ឌាចំនួន៦រូប រួមទាំងស្នងការជាន់ខ្ពស់ កាលពីថ្ងៃចន្ទ ដោយភ្ជាប់ទំនាក់ទំនងពួកគេទៅនឹងឃាតកម្មរបស់មេដឹកនាំផ្តាច់ខ្លួនសាសនាស៊ីក និងចោទប្រកាន់ពីកិច្ចខិតខំប្រឹងប្រែង ដើម្បីដាក់គោលដៅលើអ្នកប្រឆាំងឥណ្ឌា នៅក្នុងប្រទេសកាណាដា។

នៅថ្ងៃដដែលនោះ ប្រទេសឥណ្ឌា បានសងសឹកវិញដោយបញ្ជាឱ្យបណ្តេញមន្ត្រីការទូតកាណាដា ជាន់ខ្ពស់ចំនួន៦រូប រួមទាំងស្នងការជាន់ខ្ពស់ស្តីទី និងបាននិយាយថា បានដកបេសកជនរបស់ខ្លួនចេញពីប្រទេសកាណាដា ដែលផ្ទុយទៅនឹងសេចក្តីថ្លែងការណ៍នៃការបណ្តេញចេញរបស់ប្រទេសកាណាដា។

ជម្លោះផ្នែកការទូត បានបង្ហាញពីការធ្លាក់ចុះយ៉ាងខ្លាំងនៃទំនាក់ទំនងរវាងប្រទេសសហធនទាំងពីរ។ ទំនាក់ទំនង មានភាពប្រះស្រាំចាប់តាំងពីនាយករដ្ឋមន្រ្តីកាណាដា លោក Justin Trudeau បាននិយាយកាលពីឆ្នាំមុនថា លោកមានភស្តុតាងដែលភ្ជាប់ការជាប់ពាក់ព័ន្ធរបស់ភ្នាក់ងារឥណ្ឌាទៅនឹងការធ្វើឃាតមេដឹកនាំសាសនាស៊ីក លោក Hardeep Singh Nijjar នៅលើទឹកដី កាណាដា។

លោកបាននិយាយថា សកម្មភាពទាំងនេះពាក់ព័ន្ធនឹងបច្ចេកទេសនៃការប្រមូលព័ត៌មានសម្ងាត់ អាកប្បកិរិយាដោយបង្ខិតបង្ខំ ដែលដាក់គោលដៅលើពលរដ្ឋកាណាដានៅអាស៊ីខាងត្បូង និងការជាប់ពាក់ព័ន្ធក្នុងការគំរាមកំហែង និងអំពើហិង្សាជាច្រើន រួមទាំងករណីឃាតកម្ម ផងដែរ។

ប្រទេសឥណ្ឌា បានបដិសេធការចោទប្រកាន់របស់លោក Trudeau ជាយូរមកហើយ ហើយកាលពីថ្ងៃចន្ទ ឥណ្ឌាបានច្រានចោលចំណាត់ការរបស់ប្រទេសកាណាដា លើការស៊ើបអង្កេត និងបានចោទលោក Trudeau ថា បានបន្ត «របៀបវារៈនយោបាយ»។