ក្រុមមេដឹកនាំកងទ័ពបាននិយាយកាលពីថ្ងៃចន្ទដើមសប្ដាហ៍នេះថា ការដាក់ពង្រាយប្រព័ន្ធការពារតំបន់រយៈកម្ពស់ខ្ពស់ថាអាដ(THAAD) របស់សហរដ្ឋអាមេរិកទៅកាន់ប្រទេសអ៊ីស្រាអែល និងទាហានប្រហែល ១០០នាក់ដើម្បីធ្វើប្រតិបត្តិការ នឹងបន្ថែមភាពតានតឹងដែលមានស្រាប់លើកងកម្លាំងការពារដែនអាកាសរបស់កងទ័ពអាមេរិក និងការពន្យារពេលដែលអាចកើតមានក្នុងការធ្វើទំនើបកម្មប្រព័ន្ធប្រឆាំងមីស៊ីលរបស់ខ្លួន ទៅវិញទេ ។

មេដឹកនាំកំពូលទាំងពីររបស់អង្គភាពនេះបានបដិសេធមិនផ្តល់ព័ត៌មានលម្អិតស្តីពីការដាក់ពង្រាយដែលបញ្ជាដោយរដ្ឋមន្ត្រីការពារជាតិអាមេរិកលោក Lloyd Austin កាលពីចុងសប្តាហ៍នេះ។ ប៉ុន្តែពួកគេបាននិយាយយ៉ាងទូលំទូលាយអំពីការព្រួយបារម្ភរបស់ខ្លួន ខណៈតម្រូវការសម្រាប់ប្រព័ន្ធប្រឆាំងមីស៊ីល ថាអាដ (THAAD) និង ប៉ាទ្រីយ៉ូត (Patriot) កើនឡើងដោយសារតែសង្គ្រាមនៅអ៊ុយក្រែន និងជម្លោះរីកកាន់តែរវាងអ៊ីស្រាអែល និងក្រុមហេសបូឡាគាំទ្រដោយអ៊ីរ៉ង់ និងក្រុមសកម្មប្រយុទ្ធហាម៉ាស។

យោងតាមប្រភពពីក្រុមមន្ត្រីសុំមិនបញ្ចេញឈ្មោះ មន្ទីរបញ្ចកោណបានប្រកាសពីការដាក់ពង្រាយប្រព័ន្ធប្រឆាំងមីស៊ីលថាអាដ កាលពីថ្ងៃអាទិត្យ ដោយនិយាយថា ប្រព័ន្ធនេះត្រូវបានអនុញ្ញាតតាមការណែនាំរបស់លោកប្រធានាធិបតី Joe Biden ។ មន្ត្រីសហរដ្ឋអាមេរិកបាននិយាយថា ប្រព័ន្ធនេះនឹងត្រូវបញ្ជូនចេញពីទីតាំងមួយក្នុងទ្វីបអាមេរិកទៅកាន់ប្រទេសអ៊ីស្រាអែល ហើយនឹងចំណាយពេលជាច្រើនថ្ងៃទើបទៅដល់រួមទាំងទាហានផងដែរ។

វិធានការនេះបន្ថែមលើអ្វីដែលកំពុងមានភាពតានតឹងនៅក្នុងក្រសួងការពារជាតិ អំពីអាវុធណាដែលសហរដ្ឋអាមេរិក អាចមានលទ្ធភាពបញ្ជូនទៅកាន់ប្រទេសអ៊ុយក្រែន អ៊ីស្រាអែល ឬទីតាំងផ្សេងទៀត និងហានិភ័យដែលកំពុងប៉ះពាល់ដល់ការត្រៀមខ្លួនខាងយោធារបស់អាមេរិក និងសមត្ថភាពការពារប្រទេសជាតិ៕