អគ្គសេនាធិការចម្រុះរបស់កូរ៉េខាងត្បូង បាននិយាយនៅថ្ងៃអង្គារ (១៥ តុលា) នេះថា កូរ៉េខាងជើង បានបំផ្ទុះផ្នែកនៃផ្លូវអន្តរកូរ៉េមួយខ្សែនៅខាងព្រំដែនរបស់ខ្លួនដែលមានយោធាយ៉ាងខ្លាំងក្លារវាងកូរ៉េទាំងពីរ។

អង្គភាពកូរ៉េខាងត្បូងមួយនេះបាននិយាយនៅក្នុងសារមួយផ្ញើទៅកាន់ប្រព័ន្ធផ្សព្វផ្សាយថា នៅម៉ោងប្រហែលពាក់កណ្តាលថ្ងៃត្រង់នេះ ផ្នែកខ្លះនៃផ្លូវភាគខាងជើងខ្សែព្រំដែនយោធាដែលខណ្ឌចែកប្រទេសទាំងពីរ ត្រូវបានបំផ្ទុះ។

យោធាកូរ៉េខាងត្បូង បានបង្កើនការឃ្លាំមើល និងការត្រៀមខ្លួនក្នុងការឆ្លើយតបលើស្ថានភាពណាមួយ ខណៈទីក្រុងសេអ៊ូល បានព្រមានកាលពីថ្ងៃចន្ទថា ទីក្រុងព្យុងយ៉ាង កំពុងត្រៀមខ្លួនដើម្បីបំផ្ទុះផ្លូវ។ ភាពតានតឹងនៅឧបទ្វីបកូរ៉េបាននិងកំពុងកើនឡើងស្របពេលមានសង្គ្រាមពាក្យសម្តីកាន់តែខ្លាំង បន្ទាប់ពីកូរ៉េខាងជើង បានចោទគូប្រជែងរបស់ខ្លួនថាបានបញ្ជូនយានដ្រូនឆ្លងកាត់រដ្ឋធានីព្យុងយ៉ាង។

កូរ៉េខាងជើង កាលពីថ្ងៃសុក្រ សប្ដាហ៍មុនបាននិយាយថា យានដ្រូនទាំងនោះបានចែកចាយខិត្តប័ណ្ណប្រឆាំងកូរ៉េខាងជើងក្នុងចំនួនដ៏ច្រើននៅលើទីក្រុង ដែលខ្លួនហៅថាជាការញុះញង់ផ្នែកនយោបាយ និងយោធាដែលអាចនាំឱ្យមានជម្លោះប្រដាប់អាវុធ៕