ប្រធានាធិបតីវ៉េណេហ្ស៊ុយអេឡា លោក នីកូឡាស ម៉ាឌូរ៉ូ (Nicolas Maduro) បាននិយាយថា អ៊ីស្រាអែលកំពុងធ្វើសង្គ្រាមសម្លាប់រង្គាលប្រឆាំងនឹងប្រជាជនអារ៉ាប់ ដោយបង្ហាញពីសាមគ្គីភាពជាមួយប្រជាជនប៉ាឡេស្ទីន លីបង់ និងស៊ីរី។

លោក ម៉ាឌូរ៉ូ បាននិយាយនៅក្នុងកម្មវិធីទូរទស្សន៍ដែលមានចំណងជើងថា With Maduro Plus ដែលត្រូវបានចាក់ផ្សាយនៅលើប៉ុស្តិ៍ទូរទស្សន៍ Venezolana de Television ថា ប្រព័ន្ធផ្សព្វផ្សាយអន្តរជាតិ ទទូចថា អ៊ីស្រាអែលកំពុងធ្វើសង្រ្គាមប្រឆាំងនឹងក្រុមហាម៉ាស និងហេសបូឡា។ នេះ មិនមែនជាការពិតទេ នេះគឺជាសង្រ្គាមសម្លាប់រង្គាលរបស់លោក ណេតាន់យ៉ាហ៊ូ ( Netanyahu) ប្រឆាំងនឹងប្រជាជនប៉ាឡេស្ទីន ប្រជាជនអារ៉ាប់ នៅលីបង់។ នេះមិនមែនជាសង្រ្គាមទេ ប៉ុន្តែជាអំពើប្រល័យពូជសាសន៍»។

លោក ម៉ាឌូរ៉ូ បានថ្កោលទោសយ៉ាងដាច់អហង្ការ ចំពោះការទាមទាររបស់លោក ណេតាន់យ៉ាហ៊ូ ក្នុងការដកកងកម្លាំងរក្សាសន្តិភាពរបស់អង្គការសហប្រជាជាតិ ចេញពីភាគខាងត្បូងប្រទេសលីបង់។

រដ្ឋមន្ត្រីការបរទេសវ៉េណេហ្ស៊ុយអេឡា លោក Yvan Gil Pinto ដែលបានចូលរួមក្នុងកម្មវិធីរបស់លោក ម៉ាឌូរ៉ូ បាននិយាយថា ប្រជាជនប៉ាឡេស្ទីន និងលីបង់ «គឺជាជនរងគ្រោះនៃអំពើប្រល័យពូជសាសន៍ គោលនយោបាយនៃការសម្លាប់រង្គាលដោយអ៊ីស្រាអែល»។ លោកបានរាយការណ៍ថា កាលពីថ្ងៃចន្ទ ក្រុមដំបូងនៃជនជាតិវ៉េណេហ្ស៊ុយអេឡាចំនួន ៤៤នាក់ ដែលស្ថិតនៅក្នុងប្រទេសលីបង់ បានមកដល់ទីក្រុងការ៉ាកាស (Caracas)ពីប្រទេសស៊ីរី តាមជើងយន្តហោះរបស់ក្រុមហ៊ុនអាកាសចរណ៍ Conviasa ។ លោក Gil ក៏បានកត់សម្គាល់ផងដែរថា ជំនួយមនុស្សធម៌សម្រាប់ប្រជាជនលីបង់ ត្រូវបានបញ្ជូនទៅទីក្រុងដាម៉ាសនៃប្រទេសស៊ីរី រួចហើយ។