ដោយយោងតាមឯកសារដែលត្រូវបានរកឃើញដោយកងកម្លាំងអ៊ីស្រាអែល នៅតំបន់ហ្កាហ្សាស្ទ្រីប សារព័ត៌មាន Washington Post បានរាយការណ៍ថា ជាច្រើនឆ្នាំមុនពេលក្រុមហាម៉ាសវាយប្រហារអ៊ីស្រាអែល នៅថ្ងៃទី៧ ខែតុលា ឆ្នាំ២០២៣ ហើយបានចាប់ផ្តើមឲ្យមានសង្រ្គាមចុងក្រោយបំផុត នៅក្នុងតំបន់នោះ ក្រុមភេរវករមួយនេះបានគ្រោងវាយលុកកន្លែងផ្សេងទៀត ដែលរួមមានទាំងគម្រោងបំផ្ទុះអគារខ្ពស់ នៅទីក្រុង Tel Aviv ខណៈដែលដាក់សម្ពាធអ៊ីរ៉ង់ឲ្យជួយក្នុងសមរភូមិប្រឆាំងនឹងរដ្ឋជ្វីហ្វ។

យោងតាមសារព័ត៌មាននោះ បានឲ្យដឹងថា ឯកសារដែលរឹបអូសបានពីមជ្ឈមណ្ឌលបញ្ជាការរបស់ក្រុមហាម៉ាស បានបង្ហាញឲ្យឃើញនូវគ្រោងការវាយប្រហារ ដោយប្រើរថភ្លើង ទូក និងសូម្បីតែតាមរយៈរទេះសេះ។ ឯកសារចំនួន ៥៩ទំព័រនោះ រួមមានបទបង្ហាញដែលរៀបរាប់យ៉ាងលម្អិត អំពីជម្រើសដែលអាចមាន សម្រាប់ការវាយប្រហារ ក៏ដូចជាសំបុត្ររបស់ក្រុមហាម៉ាសផ្ញើទៅកាន់មេដឹកនាំកំពូលរបស់អ៊ីរ៉ង់ ក្នុងឆ្នាំ២០២១ ស្នើសុំមូលនិធិរាប់រយលានដុល្លារ និងការបណ្តុះបណ្តាល សម្រាប់យុទ្ធជនក្រុមហាម៉ាសបន្ថែមចំនួន ១២.០០០នាក់។

មន្ត្រីសន្តិសុខអ៊ីស្រាអែលម្នាក់ ដែលបានពិនិត្យសំបុត្រ និងឯកសារផែនការនោះ បានប្រាប់សារព័ត៌មាន Washington Post ថា៖ «ក្រុមហាម៉ាសមានការប្តេជ្ញាចិត្តយ៉ាងខ្លាំងក្លា ក្នុងការលុបបំបាត់អ៊ីស្រាអែល និងប្រជាជនជ្វីហ្វចេញពីផែនទី ដោយក្រុមនេះបានជោគជ័យ ក្នុងការអូសទាញអ៊ីរ៉ង់ឲ្យចូលទៅក្នុងជម្លោះដោយផ្ទាល់ ពោលគឺនៅក្រោមលក្ខខណ្ឌដែលអ៊ីរ៉ង់មិនបានត្រៀមខ្លួន»។ 

មន្ត្រីរូបនេះបាននិយាយក្នុងលក្ខខណ្ឌមិនបញ្ចេញឈ្មោះ ដើម្បីពិភាក្សាអំពីឯកសារដ៏រសើបនេះដែលត្រូវបានរឹបអូសដោយកងកម្លាំងអ៊ីស្រាអែល នៅតំបន់ហ្កាហ្សានេះ។ ចំណាត់ការដើម្បីចេញផ្សាយឯកសារនេះ កើតមានឡើងនៅពេលដែលអ៊ីស្រាអែលអាចសងសឹកអ៊ីរ៉ង់ បន្ទាប់ពីសាធារណរដ្ឋអ៊ិស្លាមបានបាញ់មីស៊ីលជិត ២០០គ្រាប់ កាលពីថ្ងៃទី១ ខែតុលា ដែលជាការឆ្លើយតបទៅនឹងការសម្លាប់លោក Hasan Nasrallah មេដឹកនាំក្រុមភេរវករហេបូឡារបស់ប្រទេសលីបង់៕