ដោយដកស្រង់សម្ដីរបស់បុគ្គលដែលដឹងពីបញ្ហា សារព័ត៌មាន Bloomberg News កាលពីថ្ងៃចន្ទ (ទី១៤ ខែតុលា) បានរាយការណ៍ថា មន្ត្រីសហរដ្ឋអាមេរិក បានពិភាក្សាអំពីការដាក់កម្រិតដល់ការលក់បន្ទះឈីបបញ្ញាសិប្បនិម្មិត (AI) កម្រិតខ្ពស់ពីក្រុមហ៊ុន Nvidia និងក្រុមហ៊ុនអាមេរិកផ្សេងទៀត ដោយផ្អែកលើមូលដ្ឋានជាក់លាក់របស់ប្រទេស។

សេចក្ដីរាយការណ៍របស់ Bloomberg បានឲ្យដឹងថា សហរដ្ឋអាមេរិកផ្តោតលើប្រទេសឈូងសមុទ្រពែក្ស ដោយបន្ថែមថា វិធីសាស្រ្តថ្មីនេះនឹងកំណត់កម្រិតខ្ពស់បំផុតរបស់អាជ្ញាប័ណ្ណនាំចេញ សម្រាប់ប្រទេសមួយចំនួន ក្នុងផលប្រយោជន៍សន្តិសុខជាតិ។ ហើយបើយោងតាមសារព័ត៌មានដដែលនេះ បានឲ្យដឹងបន្តថា គំនិតនេះទទួលបានការចាប់អារម្មណ៍ ក្នុងរយៈពេលប៉ុន្មានសប្តាហ៍ថ្មីៗនេះ ខណៈការពិចារណា ស្ថិតក្នុងដំណាក់កាលដំបូង ហើយនៅតែអាចមានការកែប្រែ។

ក្រសួងពាណិជ្ជកម្មអាមេរិក និងក្រុមហ៊ុន Nvidia បានបដិសេធមិនធ្វើអត្ថាធិប្បាយអ្វីទេ ខណៈដែលក្រុមហ៊ុន Intel និង AMD ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយរបស់សារព័ត៌មាន Reuters។ 

គួរបញ្ជាក់ថា កាលពីខែមុន ក្រសួងពាណិជ្ជកម្មអាមេរិក បានបង្ហាញច្បាប់ដែលអាចសម្រួលដល់ការដឹកជញ្ជូនបន្ទះឈីប AI ដូចជាត្រូវបានផលិតពីក្រុមហ៊ុន Nvidia ជាដើម ទៅកាន់មជ្ឈមណ្ឌលទិន្នន័យ នៅតំបន់មជ្ឈិមបូព៌ា៕