មន្ត្រីអាមេរិក កាលពីថ្ងៃចន្ទ (ទី១៤ ខែតុលា) បាននិយាយថា សហរដ្ឋអាមេរិកបានព្រមានរដ្ឋាភិបាលអ៊ីរ៉ង់ឲ្យបញ្ឈប់រាល់ផែនការប្រឆាំងនឹងលោក Donald Trump ហើយបានបញ្ជាក់ថា ទីក្រុងវ៉ាស៊ីនតោន នឹងចាត់ទុកការប៉ុនប៉ងណាមួយលើជីវិតរបស់បេក្ខជននៃគណបក្សសាធារណរដ្ឋរូបនេះថា ជាទង្វើបង្កសង្គ្រាម។

មន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់ថា ប្រធានាធិបតីអាមេរិក លោក Joe Biden ត្រូវបានគេរាយការណ៍ជាទៀងទាត់ អំពីការគំរាមកំហែងនេះ ហើយលោកបានណែនាំក្រុមរបស់លោកឲ្យដោះស្រាយជាមួយគម្រោងការអាក្រក់ៗរបស់អ៊ីរ៉ង់ ប្រឆាំងនឹងជនជាតិអាមេរិក។

តាមការណែនាំរបស់លោក Biden មន្ត្រីជាន់ខ្ពស់របស់សហរដ្ឋអាមេរិក បានផ្ញើសារទៅកាន់ឥស្សរជនកម្រិតខ្ពស់បំផុតរបស់រដ្ឋាភិបាលអ៊ីរ៉ង់ ដោយព្រមានក្រុងតេអេរ៉ង់ឲ្យបញ្ឈប់រាល់ផែនការប្រឆាំងនឹងលោក Trump និងអតីតមន្ត្រីអាមេរិក។

មន្ត្រីរូបនេះបានប្រាប់ថា ប្រជាជនអ៊ីរ៉ង់ត្រូវបានប្រាប់ថា ទីក្រុងវ៉ាស៊ីនតោននឹងចាត់ទុកគម្រោងនោះជាទង្វើបង្កសង្រ្គាម ប្រសិនបើការប៉ុនប៉ងណាមួយត្រូវបានធ្វើឡើង ដើម្បីបង្កគ្រោះថ្នាក់ដល់ជីវិតរបស់លោក Trump។

តែយ៉ាងណាក្ដី អ៊ីរ៉ង់បានបដិសេធមិនបានជ្រៀតជ្រែក ក្នុងកិច្ចការរបស់សហរដ្ឋអាមេរិក។ ផ្ទុយទៅវិញ ទីក្រុងតេអេរ៉ង់ និយាយថា ទីក្រុងវ៉ាស៊ីនតោនបានជ្រៀតជ្រែកក្នុងកិច្ចការរបស់ខ្លួនអស់ជាច្រើនទសវត្សរ៍មកហើយ ដោយលើកឡើងពីព្រឹត្តិការណ៍នានា រាប់ចាប់ពីរដ្ឋប្រហារឆ្នាំ១៩៥៣ ប្រឆាំងនឹងនាយករដ្ឋមន្ត្រីរហូតដល់ការសម្លាប់មេបញ្ជាការយោធារបស់ខ្លួន ក្នុងឆ្នាំ២០២០ នៅក្នុងការវាយប្រហារដោយយានដ្រូនរបស់សហរដ្ឋអាមេរិក៕