រដ្ឋមន្ត្រីការបរទេសចិន លោក Wang Yi កាលពីថ្ងៃចន្ទ (ទី១៤ ខែតុលា) បានអំពាវនាវដល់គ្រប់ភាគីពាក់ព័ន្ធនៅក្នុងភាពតានតឹង រវាងអ៊ីស្រាអែល និងអ៊ីរ៉ង់ ឲ្យអនុវត្តការប្រុងប្រយ័ត្ន និងជៀសវាងការធ្វើឲ្យស្ថានការណ៍កាន់តែតានតឹងឡើងៗ។

សេចក្តីថ្លែងការណ៍របស់ក្រសួងការបរទេសចិន បានឲ្យដឹងថា នៅក្នុងការសន្ទនាតាមទូរសព្ទជាមួយរដ្ឋមន្ត្រីការបរទេសអ៊ីស្រាអែល លោក Israel Katz លោក Wang ក៏បានជំរុញឲ្យអ៊ីស្រាអែលធានាសុវត្ថិភាពរបស់បុគ្គលិកនៃកងកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់ (UNIFIL)។

ហើយជាមួយគ្នានេះ លោកក៏បានរំលឹកឡើងវិញនូវជំហររបស់ទីក្រុងប៉េកាំង ចំពោះជម្លោះ នៅតំបន់ហ្កាហ្សា ដោយអំពាវនាវឲ្យមានបទឈប់បាញ់ជាបន្ទាន់ ពេញលេញ និងជាអចិន្ត្រៃយ៍។

ចំណែកលោក Katz បាននិយាយថា ក្នុងអំឡុងពេលការជជែកគ្នាតាមទូរសព្ទនោះ លោកបាន «បញ្ជាក់យ៉ាងច្បាស់ថា អ៊ីរ៉ង់គឺជាប្រភពចម្បង ក្នុងការធ្វើឲ្យខូចស្ថិរភាព នៅតំបន់មជ្ឈិមបូព៌ា» ហើយបាននិយាយថា អ៊ីរ៉ង់បង្កការគំរាមកំហែងដោយផ្ទាល់តាមរយៈភ្នាក់ងាររបស់ខ្លួន ដែលរួមមានទាំងក្រុមហាម៉ាស និងក្រុមហេសបូឡាផងដែរ៕