រដ្ឋមន្ត្រីការពារជាតិរុស្ស៊ី លោក Andrey Belousov បាននិយាយនៅក្នុងកិច្ចប្រជុំជាមួយអនុប្រធានគណៈកម្មការយោធាមជ្ឈិមនៃសាធារណរដ្ឋប្រជាមានិតចិន លោក Zhang Youxia ថា មន្ត្រីការពារជាតិរុស្ស៊ី និងចិន បានរួបរួមគ្នាក្នុងការវាយតម្លៃរបស់ពួកគេអំពីដំណើរការសកល ហើយពួកគេ មានការយល់ដឹងរួមអំពីអ្វីដែលត្រូវធ្វើ ក្នុងស្ថានភាពបច្ចុប្បន្ន។ 

លោក Belousov បាននិយាយថា៖«កាលពីម្សិលមិញ យើងបានពិភាក្សាដ៏មានអត្ថន័យជាមួយរដ្ឋមន្ត្រីក្រសួងការពារជាតិនៃសាធារណៈរដ្ឋប្រជាមានិតចិន ហើយយើងឃើញថា យើងមានទស្សនៈរួម ការវាយតម្លៃទូទៅអំពីស្ថានភាព និងការយល់ដឹងរួមអំពីអ្វីដែលយើងត្រូវធ្វើរួមគ្នា»។

លោកបានចង្អុលបង្ហាញថា ដោយសារការខិតខំប្រឹងប្រែងរបស់មេដឹកនាំនៃប្រទេសទាំងពីរ ប្រធានាធិបតីចិន លោក ស៊ី ជីនពីង (Xi Jinping) និងសមភាគីរុស្ស៊ីលោក វ្ល៉ាឌីមៀ ពូទីន (Vladimir Putin) រដ្ឋបានកសាងទំនាក់ទំនងដៃគូយុទ្ធសាស្ត្រមួយ។

មន្ត្រីការពារជាតិជាន់ខ្ពស់រុស្ស៊ី បាននិយាយថា៖ «ភារកិច្ចរបស់យើង គឺពង្រឹងនិងអភិវឌ្ឍន៍ទំនាក់ទំនងដៃគូយុទ្ធសាស្ត្រនេះ»។

លោក Belousov បានសង្កត់ធ្ងន់ថា ថ្ងៃនេះ «នឹងមានការងារប្រកបដោយផ្លែផ្កានិងការអនុម័តការសម្រេចចិត្តសំខាន់ៗ»។ លោករដ្ឋមន្ត្រី ក៏បាននិយាយផងដែរថា ឆ្នាំនេះរុស្ស៊ី និងចិន ប្រារព្ធខួបលើកទី ៧៥ នៃការបង្កើតទំនាក់ទំនងការទូត ហើយឆ្នាំបន្ទាប់នឹងប្រារព្ធខួបលើកទី ៨០នៃជ័យជម្នះរួមគ្នាលើរបបហ្វាស៊ីសនិយម។