នៅក្នុងបទសម្ភាសន៍មួយដែលបានចេញផ្សាយ នៅថ្ងៃអង្គារ (ទី១៥ ខែតុលា) នេះ ឯកអគ្គរដ្ឋទូតអង់គ្លេស ប្រចាំនៅទីក្រុង Tbilisi (ប៊ីលីស៊ី) បានប្រាប់ថា ចក្រភពអង់គ្លេសបានផ្អាកកិច្ចសន្ទនាសន្តិសុខប្រចាំឆ្នាំរបស់ខ្លួនជាមួយប្រទេសហ្សកហ្ស៊ី ហើយបានលុបចោលកិច្ចពិភាក្សាផ្សេងទៀត ស្តីពីការការពារជាតិ ជុំវិញការព្រួយបារម្ភអំពីការដើរថយក្រោយនៃលទ្ធិប្រជាធិបតេយ្យរបស់ប្រទេសនេះ។

លោកឯកអគ្គរដ្ឋទូត Gareth Ward បានប្រាប់ទីភ្នាក់ងារសារព័ត៌មាន InterPress ថា៖ «ខ្ញុំបានរំពឹងថា យើងនឹងធ្វើការរួមគ្នា ដើម្បីពង្រឹងភាពធន់របស់ហ្សកហ្ស៊ី និងវិបុលភាពរួមរបស់យើង ប៉ុន្តែកាលពីឆ្នាំមុន រដ្ឋាភិបាលហ្សកហ្ស៊ីបានជ្រើសរើសផ្លូវផ្សេង»។

តំណភ្ជាប់ទៅបទសម្ភាសន៍ត្រូវបានបង្ហោះនៅលើទំព័រ Facebook របស់ស្ថានទូត។ ភ្លាមៗនេះ ការិយាល័យបរទេស ក្នុងទីក្រុងឡុងដ្រ៍ មិនបានឆ្លើយតប ចំពោះសំណើសុំការអត្ថាធិប្បាយនោះឡើយ។

ហ្សកហ្ស៊ីដែលមានប្រជាជនប្រហែល ៣លាននាក់ ដោយប្រពៃណី ជារដ្ឋមួយ ក្នុងចំណោមរដ្ឋគាំទ្រលោកខាងលិចបំផុត ដែលបានលេចឡើងពីការដួលរលំរបស់សហភាពសូវៀត តែទំនាក់ទំនងរបស់ប្រទេសនេះ ជាមួយលោកខាងលិច បានជួបនឹងភាពអាប់អួនៅឆ្នាំនេះ ក្នុងចន្លោះរយៈពេលមុនដល់ការបោះឆ្នោតសភា នៅថ្ងៃទី៣០ ខែតុលា។

បណ្តាប្រទេសលោកខាងលិច បានរិះគន់ហ្សកហ្ស៊ី ពាក់ព័ន្ធទៅនឹងច្បាប់ដែលត្រូវបានអនុម័ត កាលពីខែឧសភាដែលតម្រូវឲ្យក្រុមទទួលបានមូលនិធិពីបរទេសចុះឈ្មោះជាភ្នាក់ងារបរទេស ដោយការធ្វើបែបនេះត្រូវបានក្រុមប្រឆាំងនិយាយថា ជាការជំរុញដោយច្បាប់របស់រុស្ស៊ីដែលប្រើដើម្បីរារាំងអ្នកជំទាស់៕