នាយករដ្ឋមន្ត្រីអ៊ីតាលី លោកស្រី Giorgia Meloni នៅថ្ងៃអង្គារ (ទី១៥ ខែតុលា) នេះ បានទាមទារឲ្យមានការធានាសន្តិសុខ សម្រាប់កងទ័ពរបស់ប្រទេសទាំងអស់ដែលដាក់ពង្រាយ នៅក្នុងប្រទេសលីបង់ ជាកន្លែងដែលកងរក្សាសន្តិភាពរបស់អង្គការសហប្រជាជាតិ (UN) បានរងការបាញ់ប្រហារ ក្នុងអំឡុងពេលមានជម្លោះ រវាងអ៊ីស្រាអែល និងក្រុមហេសបូឡា។

អ៊ីតាលីមានកងទ័ពដាក់ពង្រាយ នៅក្នុងបេសកកម្មរក្សាសន្តិភាពរបស់ UN ដែលគេស្គាល់ថា UNIFIL និងនៅក្នុងបេសកកម្មដាច់ដោយឡែកមួយទៀតឈ្មោះ MIBIL ដែលមានភារកិច្ចបណ្តុះបណ្តាលកងកម្លាំងប្រដាប់អាវុធក្នុងស្រុក។ មានទាហានអ៊ីតាលីជាង ១.០០០នាក់ នៅក្នុងកងកម្លាំងបណ្តោះអាសន្នរបស់ UN នៅលីបង់។

គួរបញ្ជាក់ថា ក្រុមប្រឹក្សាសន្តិសុខ UN កាលពីថ្ងៃចន្ទ (ទី១៤ ខែតុលា) បានសម្តែងការព្រួយបារម្ភ បន្ទាប់ពីទីតាំងរក្សាសន្តិភាពជាច្រើនរបស់ UN បានទទួលរងនូវការបាញ់ប្រហារ នៅភាគខាងត្បូងលីបង់ ហើយដោយមិនបញ្ចេញឈ្មោះពីភាគីណាមួយ ស្ថាប័នមួយនេះបានជំរុញឲ្យភាគីទាំងអស់គោរពសុវត្ថិភាព និងសន្តិសុខរបស់បុគ្គលិក និងបរិវេណអាគាររបស់ UNIFIL។

ដោយពណ៌នាការវាយប្រហារនោះថា ជា «ការរំលោភបំពានជាក់ស្ដែង» លើសេចក្តីសម្រេចរបស់ UN ស្តីពីការបញ្ចប់អរិភាព រវាងក្រុមហេសបូឡា និងអ៊ីស្រាអែល លោកស្រី Meloni បាននិយាយថា៖ «យើងជឿថា ទង្វើរបស់កងកម្លាំងអ៊ីស្រាអែល គឺមិនសមហេតុផលទាល់តែសោះ»។

នៅក្នុងសុន្ទរកថាទៅកាន់ព្រឹទ្ធសភារបស់ប្រទេសអ៊ីតាលី លោកស្រីបានលើកឡើងថា អ្វីដែលអ៊ីស្រាអែលបានធ្វោះ មិនអាចទទួលយកបានឡើយ ហើយថា លោកស្រីបានបង្ហាញពីជំហរនេះទៅកាន់នាយករដ្ឋមន្ត្រីអ៊ីស្រាអែល Benjamin Netanyahu៕