ស្វាយរៀង៖ ការបន្តបម្រើផលប្រយោជន៍ របស់ប្រជាពលរដ្ឋ គឺជាបេសកកម្ម និងគោលដៅរួមរបស់យើងទាំងអស់គ្នា ក្នុងនាមជាមន្រ្តីរាជការក្រុមការងារគណបក្ស និងបេក្ខជនឈរឈ្មោះបោះឆ្នោតជ្រើស រើសក្រុមប្រឹក្សាឃុំសង្កាត់ ដែលនេះជាការលើកឡើង របស់លោក លី ធុជ សមាជិកគណៈកម្មាធិការកណ្តាល និងជាប្រធានក្រុមការងារគណបក្ស ចុះមូលដ្ឋានក្រុងបាវិត ក្នងនាមលោកស្រីកិត្តិសង្គហ បណ្ឌិត ម៉ែន សំអន សមាជិកាគណ: អចិន្ត្រៃយ៍ គណៈកម្មាធិការកណ្តាល និងជាប្រធានក្រុមការងារ គណបក្ស ចុះមូលដ្ឋានខេត្តស្វាយរៀង។
នៅព្រឹកថ្ងៃទី០៩ ខែតុលា ឆ្នាំ២០២១ លោក លី ធុជ ប្រធានក្រុមការងារគណបក្ស ចុះមូលដ្ឋានក្រុងបាវិត បានអញ្ជើញ ដឹកនាំកិច្ចប្រជុំក្រុមការងារគណបក្ស ចុះមូលដ្ឋានក្រុងបាវិត ដើម្បីរៀបចំបញ្ជីផ្គូរផ្គង់ បេក្ខជនបោះឆ្នោតជ្រើសក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ ដែលកិច្ចប្រជុំនេះ មានការ អញ្ជើញចូលរួមពីប្រធាន អនុប្រធាន ក្រុមការងារគណបក្ស ចុះមូលដ្ឋានក្រុងបាវិត ប្រធានក្រុមការងារ គណបក្ស ចុះមូលដ្ឋានសង្កាត់ទាំង៥ និងសមាជិកអចិន្ត្រៃយ៍ នៃគណ:កម្មាធិការគណបក្សក្រុងបាវិត។
ក្នុងនាមលោកស្រីកិត្តិសង្គហបណ្ឌិត លោក លី ធុជ បានជំរុញឲ្យក្រុមការងារគណបក្ស គណបក្សក្រុង និងគណបក្សមូលដ្ឋាន ត្រូវជ្រើសរើសបេក្ខភាពឈរឈ្មោះបោះឆ្នោតក្រុមប្រឹក្សាឃុំសង្កាត់ អាណត្តិទី៥ ជាបេក្ខជន ដែលមានសមត្ថភាព មានទំនាក់ទំនងល្អជាមួយប្រជាពលរដ្ឋ ចេះស្គាល់ទុក្ខធុរៈ របស់ប្រជាពលរដ្ឋ និងស្មោះស្ម័គ្រ នឹងគណបក្សប្រជាជនកម្ពុជា ជាពិសេសជាអ្នកបម្រើប្រជាជនមូលដ្ឋាន ដែល ក្នុងការជ្រើសរើសនេះ ត្រូវធ្វើការប្រកាន់ខ្ជាប់តាមការកំណត់ និងការណែនាំអំពីក្រមសីលធម៌ សម្រាប់ ក្រុមការងារ គណៈកម្មាធិការគណបក្ស បេក្ខជនឈរឈ្មោះបោះឆ្នោត និងអង្គបោះឆ្នោត។
ក្នុងឱកាសនោះ លោក លី ធុជ បានណែនាំឲ្យក្រុមការងារគណបក្ស និងគណបក្សមូលដ្ឋាន ត្រូវបន្ត ពង្រឹងសកម្មភាពគណបក្ស នៅតាមមូលដ្ឋាន និងលើកកម្ពស់ការយកចិត្តទុកដាក់ ចំពោះសមាជិក សមាជិកាគណបក្សតាមរយៈការរក្សានូវទំនាក់ទំនងឲ្យបានល្អ និងជិតស្និត។
លោកក៏បានជម្រុញឲ្យក្រុមការងារគណបក្សទាំងអស់ ត្រូវត្រៀមឲ្យបានរួចរាល់នូវសកម្មភាពលម្អិត និងផែនការអាទិភាពអោយបានច្បាស់សម្រាប់ការងារឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ខាងមុខនេះ ដើម្បីភាពជោគជ័យរបស់គណបក្សប្រជាជនកម្ពុជា និងរាជរដ្ឋាភិបាល កម្ពុជាក្រោមការដឹកនាំរបស់សម្ដេចតេជោ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
