ក្រុមមន្ត្រីរដ្ឋបាននិយាយកាលពីថ្ងៃអង្គារ (១៥ តុលា) ថា អ្នកស្រុករាប់សែននាក់នៅរដ្ឋ ចចា (Georgia) បានសម្រុកទៅបោះឆ្នោតក្នុងតួលេខខ្ពស់បំផុតក្នុងកំណត់ត្រា ខណៈរដ្ឋប្រទាញប្រទង់នេះបានចាប់ផ្ដើមការបោះឆ្នោតមុនថ្ងៃកំណត់ សម្រាប់ការបោះឆ្នោតប្រធានាធិបតីនៅថ្ងៃទី០៥ ខែវិច្ឆិកា រវាងបេក្ខភាពបក្សប្រជាធិបតេយ្យ លោកស្រី Kamala Harris និងបេក្ខភាពបក្សសាធារណរដ្ឋ លោក Donald Trump។

យ៉ាងហោចណាស់មានអ្នកបោះឆ្នោតចំនួន ២៥២.០០០នាក់ បានទៅបោះឆ្នោតនៅតាមទីតាំងនានាមុនម៉ោង ៤រសៀល (ម៉ោងក្នុងស្រុក) ដែលនេះជាតួលេខជិតទ្វេដងនៃចំនួន ១៣៦.០០០នាក់ ដែលចូលរួមក្នុងថ្ងៃដំបូងនៃការបោះឆ្នោតមុនថ្ងៃកំណត់ក្នុងការបោះឆ្នោតឆ្នាំ២០២០ នេះបើយោងតាមមន្ត្រីបោះឆ្នោតរបស់រដ្ឋ ចចា។

ការបោះឆ្នោតមុនថ្ងៃកំណត់ មិនថាដោយផ្ទាល់ ឬតាមប្រអប់សំបុត្រនោះទេ បានក្លាយជាការពេញនិយមកាន់តែខ្លាំងឡើងក្នុងចំណោមពលរដ្ឋអាមេរិក។ យោងតាមមណ្ឌលសិក្សាការបោះឆ្នោតរបស់សាកលវិទ្យល័យ ហ្វ្លរីដា (University of Florida) បង្ហាញថា អ្នកបោះឆ្នោតជិត ម្នាក់ក្នុងចំណោម ៧នាក់ បានទៅបោះឆ្នោតមុនថ្ងៃកំណត់កាលពីឆ្នាំ២០២០។ ទោះជាយ៉ាងណាក៏ដោយ សមាជិកបក្សសាធារណរដ្ឋជាច្រើនបានជំទាស់នឹងការពង្រីកការបោះឆ្នោតតាមប្រអប់សំបុត្រនៅក្នុងឆ្នាំនោះ ដោយលើកឡើងថាមិនសូវមានសុវត្ថិភាពដូចការបោះឆ្នោតដោយផ្ទាល់ទេ។

អ្នកសាធារណរដ្ឋមួយចំនួនបន្តទទូចថា អ្នកបោះឆ្នោតគួរតែទៅបោះដោយផ្ទាល់បានតែនៅថ្ងៃបោះឆ្នោតប៉ុណ្ណោះ ទោះជាក្រុមមន្ត្រីបក្សកំពុងលើកទឹកចិត្តអ្នកគាំទ្រឱ្យបោះឆ្នោតមុនពេលកំណត់ក៏ដោយ។ យោងតាមមណ្ឌលសិក្សាការបោះឆ្នោតបានឱ្យដឹងថា នៅទូទាំងប្រទេស ប្រជាជនអាមេរិកចំនួន ៥,៥លាននាក់ បានបោះឆ្នោតរួចហើយនៅឆ្នាំ២០២៤នេះ៕