សិស្សសាលានៅប្រទេសលីបង់អាយុ៦ឆ្នាំម្នាក់ បានភ្ញាក់ពីដំណេក ហើយស្លៀកពាក់ឯកសណ្ឋានសាលារៀនដើម្បីចូលរៀននៅថ្ងៃដំបូងរបស់នាង នៅសាលារៀនដែលបានចាប់ផ្តើមឆ្នាំសិក្សាថ្មី ទោះបីជានៅមានជម្លោះ ក៏ដោយ។

ម្តាយរបស់នាង Rita Aoun ដែលជាគ្រូបង្រៀននៅក្នុងសាលាដូចគ្នាដែរនោះ បានប្តេជ្ញាចិត្តក្នុងការផ្តល់ការអប់រំដល់កូនៗរបស់នាង ដោយជឿថា វាមានសារៈសំខាន់សម្រាប់ការអភិវឌ្ឍន៍របស់ពួកគេ។

នៅក្នុងសាលារៀន មានការប្រុងប្រយ័ត្នជាមុន ដែលត្រូវយកមកពិចារណាសម្រាប់សិស្ស។

នាង Aoun និយាយថា យើងបានត្រៀមខ្លួនរួចហើយ ដោយសង្ឃឹមថានឹងពុំមានអ្វីកើតឡើងនោះទេ តែបើមានអ្វីកើតឡើង សាលារៀនអាចការពារកុមារបាន។

សាលារៀនឯកជនមួយចំនួន បានជ្រើសរើសការបើកសាលារៀនឡើងវិញ និងចាប់ផ្តើមឆ្នាំសិក្សាថ្មីរបស់ពួកគេ។ ប៉ុន្តែសាលារៀនរបស់រដ្ឋនៅតែបន្តបិទដដែល ខណៈសាលារៀនជាច្រើនកន្លែង ត្រូវបានគេប្រើប្រាស់ជាទីជម្រកសម្រាប់ជនភៀសខ្លួន ហើយជាធម្មតាពុំមានកន្លែងសម្រាប់ថ្នាក់រៀននោះទេ។

រដ្ឋមន្ត្រីក្រសួងអប់រំរបស់ប្រទេសលីបង់ លោក Abbas Halabi បានប្រកាសថា ការចាប់ផ្តើមឆ្នាំសិក្សាថ្មី នឹងត្រូវពន្យារពេលរហូតដល់ចុងខែតុលា ឬដើមខែវិច្ឆិកា ដោយសង្ឃឹមថា ស្ថានភាពសន្តិសុខនឹងមានស្ថេរភាព នៅពេលនោះ។