​បាល់ទាត់៖ លោក Keisuke Honda អ្នកចាត់ការ​ទូទៅ​ក្រុម​ជម្រើសជាតិ​កម្ពុជា បាន​សម្ដែង​ការមិនសប្បាយចិត្តចំពោះ​ជ័យជម្នះ ១-០ លើ​ក្រុម​កោះ​ហ្គាំក្នុងជំនួប​ជើង​ទី​១ នៃ​វគ្គ​ជម្រុះ​ពានរង្វាន់ AFC Asian Cup China 2023 នៅ​ប្រទេស​បា​រ៉ែ​នកាលពី​ចុង​សប្ដាហ៍​កន្លងទៅ​ឡើយ ដោយ​លោក​លើកឡើង​ត្រង់ៗ​ថា ខ្លួន​ខកចិត្ត​នឹង​ទម្រង់​លេង​របស់​ក្រុមដែល​ធ្វើ​មិនបាន​ល្អ ដូច​កាល​ប៉ះ​ក្រុម​ខ្លាំងៗ​នាពេល​កន្លងមក។​

​សមាជិក​ក្លិប FK Suduva នៃ​លី​គ​កំពូល​លី​ទុយ​អា​នី​រូបនេះបាន​បញ្ជាក់ថា លោក​គួរតែ​សប្បាយចិត្ត ព្រោះ​គោព្រៃ​កម្ពុជាបាន​យកឈ្នះ​កោះ​ហ្គាំ តែ​ផ្ទុយទៅវិញលោក​បែរជា​ខកចិត្ត ព្រោះ​ទម្រង់​លេង​របស់​ក្រុម​ខ្លួន គឺ​មិនល្អ​ដូច​ពេល​លេង​ជាមួយ​ក្រុម​ខ្លាំងៗកន្លងមក​នោះទេ ទោះ​ពេលនោះ​កម្ពុជា​ចាញ់​មែន តែ​លោក​សប្បាយចិត្ត​ជាង ព្រោះ​ក្រុម​មាន​ទម្រង់​លេង​ប្រសើរ​ជាង​ការប្រកួត​ជាមួយ​កោះ​ហ្គាំ​ពេលនេះ។ Keisuke Honda បាន​សង្កត់ធ្ងន់ថា បើ​យើង​រីករាយ​ជាមួយ​លទ្ធផល​នេះ ជាមួយ​ទម្រង់​លេង​បែបនេះ តើ​ពេលណា​ទើប​យើង​អាច​លេង​ឈ្នះ​ក្រុម​ខ្លាំងៗក្នុង​តំបន់​ដូចជា​វៀតណាម ឬ​ថៃ​បាន​នោះ​? លោក​ថា ការអភិវឌ្ឍន៍​កាយសម្បទា និង​បច្ចេកទេស ជា​ចំណុច​ដែល​កីឡាករ​ភាគច្រើន​ផ្ដោតលើ ក៏​ដូចគ្នា​ត្រូវ​ពង្រឹង​ផ្នែក​ទាំងនោះ ប៉ុន្ដែ​អ្វីដែល​ពិសេស​ជាង​នោះគឺ​ត្រូវ​យល់ដឹង​ពី​ការប្រើប្រាស់​តាក់​តិច ដែលជា​កត្ដា​ដែល​ធ្វើ​ឲ្យ​កម្ពុជា​អាច​ប្រកួតប្រជែង​ជាមួយ​ក្រុម​ខ្លាំងៗ​បាន។​

​សូមបញ្ជាក់ថា ជំនួប​ជើង​ទី​១ ជាមួយ​កោះ​ហ្គាំ កម្ពុជា​បានដាក់​សម្ពាធ​ខ្លាំង​លើ​គូប្រកួត​ក្នុង​វគ្គ​ទី​១ តែ​រកបាន ១​គ្រាប់​ប៉ុណ្ណោះ ខណៈ​វគ្គ​ទី​២ ទម្រង់​លេង​របស់​ក្រុម​គោព្រៃ​កម្ពុជាហាក់​មិនល្អ​ប្រសើរ​ឡើយ។ ការណ៍​នេះអាចជា​មូលហេតុ​ដ៏​សំខាន់ដែល​នាំ​ឲ្យ​លោក Keisuke Honda មិន​សប្បាយ​ចិត្តនឹង​ទម្រង់​លេង​របស់​ក្រុម។ តែ​យ៉ាងណា​កម្ពុជានៅមាន​ភារកិច្ច​ដ៏​សំខាន់​បន្ដទៀត ដោយ​ត្រូវ​ជួប​កោះ​ហ្គាំក្នុង​ជើង​ទី​២ នា​រាត្រី​ថ្ងៃ​អង្គា​រ៍​ស្អែក​នេះដើម្បី​កាត់សេចក្ដី​រក​ក្រុម​ឡើង​វគ្គ​ចែក​ពូ​ល​ជុំ​ទី​៣ នៃ​ពានរង្វាន់ AFC Asian Cup China 2023៕

​អត្ថបទ៖ លី ឈុន​ឡា