ក្រុមអ្នកតវ៉ារាប់រយនាក់ បានមកប្រមូលផ្តុំគ្នានៅតាមដងផ្លូវនៅទីក្រុង Butembo ដោយបង្ហាញពីការគាំទ្រដល់កងទ័ពប្រទេសកុងហ្គោ (FARDC) និងអំពាវនាវឱ្យមានសកម្មភាពយោធាកាន់តែខ្លាំងឡើងប្រឆាំងក្រុមឧទ្ទាម ដែលកំពុងកាន់កាប់នៅតំបន់ភាគខាងកើតប្រទេស។

ការចេញធ្វើបាតុកម្មនេះ ត្រូវបានរៀបចំឡើងដោយក្រុមយុវជន និងសកម្មជនក្នុងស្រុក។ អ្នកតវ៉ាម្នាក់ និយាយថា «យើងធុញទ្រាន់នឹងការសម្លាប់រង្គាល និងបញ្ហាសន្តិសុខ» ដោយជំរុញឱ្យសហគមន៍បង្ហាញសាមគ្គីភាព ជាមួយកងទ័ព។

ប្រទេសកុងហ្គោភាគខាងកើត ត្រូវបានញាំញីដោយអំពើហិង្សាពីសំណាក់ក្រុមឧទ្ទាមជាច្រើនក្រុម រួមទាំងក្រុម M23 ដែលត្រូវបានចោទប្រកាន់ថា បានទទួលការគាំទ្រពីប្រទេសជិតខាងរ្វាន់ដា ជាការចោទប្រកាន់ដែលប្រទេសរ្វាន់ដា បដិសេធ។

ទោះបីជាមានកិច្ចព្រមព្រៀងសន្តិភាពក៏ដោយ ក៏តំបន់នេះនៅតែគ្រោះថ្នាក់ ដោយជនស៊ីវិលត្រូវទទួលរងពីអំពើហិង្សាជាញឹកញាប់។

យោងតាមអង្គការសហប្រជាជាតិ បានឲ្យដឹងថា មនុស្សជាង៥លាននាក់ បានភៀសខ្លួនចេញពីលំឋាននៅក្នុងប្រទេសកុងហ្គោ ដោយសារតែជម្លោះនៅតែបន្ត ។