ប្រព័ន្ធផ្សព្វផ្សាយ BBC របស់អង់គ្លេស បានប្រកាសកាត់បន្ថយបុគ្គលិកនៅក្នុងនាយកដ្ឋានព័ត៌មាន និងកិច្ចការបច្ចុប្បន្នរបស់ខ្លួន ដែលនឹងជួយសន្សំប្រាក់បាន ២៤លានផោន ឬប្រហែល ៣១.៤លានដុល្លារអាមេរិក។ សារព៌មាន BBC News បានរាយការណ៍ថា ការងារសរុបចំនួន ១៥៥មុខតំណែង នឹងត្រូវបាត់បង់ ដោយជំហាននេះជាផ្នែកនៃកិច្ចខិតខំប្រឹងប្រែងកាន់តែទូលំទូលាយដើម្បីកាត់បន្ថយការចំណាយចំនួន ៧០០លានផោន ក្នុងមួយឆ្នាំនៅទូទាំងសាជីវកម្ម។

នៅក្នុងសារអ៊ីមែលទៅកាន់បុគ្គលិកកាលពីថ្ងៃអង្គារ (១៥ តុលា) នាយកប្រតិបត្តិ BBC News លោកស្រី ដេបូរ៉ា ធឺនេស (Deborah Turness) បាននិយាយថា ក្រុមហ៊ុនចង់កាត់បន្ថយតួនាទីចំនួន ១៨៥តំណែង និងបើកមុខតំណែងថ្មីចំនួន៥៥។ នេះនឹងបណ្តាលឱ្យបាត់បង់ការងារផ្នែកសារព័ត៌មានចំនួន១៣០។ បុគ្គលិកបន្ថែមចំនួន ២៥នាក់ទៀត ក្នុងតួនាទីបច្ចេកទេស ដូចជាប្រតិបត្តិករកាមេរ៉ា ក៏ស្ថិតក្នុងហានិភ័យផងដែរ។

លោកស្រី Turness បន្ថែមថា ទឹកប្រាក់ចំនួន ២៤លានផោនដែលសន្សំបាននោះ តំណាងឱ្យ ៤% នៃថវិកាព័ត៌មានរបស់ស្ថាប័ន។ BBC News និយាយថា ការបញ្ឈប់ការងារគឺជាផ្នែកមួយនៃផែនការទូលំទូលាយដោយប្រព័ន្ធផ្សព្វផ្សាយនេះដើម្បីកាត់បន្ថយការងារចំនួន ៥០០តំណែង នៅទូទាំងសាជីវកម្មនៅខែមីនា ឆ្នាំ២០២៦ ដើម្បីបង្កើតប្រាក់សន្សំប្រចាំឆ្នាំសរុបចំនួន ៧០០លានផោន ដូចទៅនឹងឆ្នាំ២០២២។

ប្រធានសហភាពអ្នកសារព័ត៌មានជាតិ លោកស្រី មីស្ហែល ស្តានីសស្រ្ទីត (Michelle Stanistreet) បាននិយាយថា ការកាត់បន្ថយការងារចុងក្រោយនេះ “តំណាងឱ្យការវាយលុកយ៉ាងធ្ងន់ធ្ងរលើវិស័យព័ត៌មាន ក្នុងពេលដែលចក្រភពអង់គ្លេស ត្រូវការព័ត៌មានច្រើន និងភាពចម្រុះកាន់តែច្រើន ហើយការជឿទុកចិត្តលើវិស័យសារព័ត៌មានកំពុងរងការវាយប្រហារ ទាំងក្នុង និងក្រៅប្រទេស”៕