អាជ្ញាធរ បាននិយាយថា មនុស្សយ៉ាងហោចណាស់២១នាក់ រួមមានបុគ្គលិក អ្នកនៅជិតខាង និងអ្នកពន្លត់អគ្គិភ័យ បានរងរបួស កាលពីថ្ងៃអង្គារ ទី១៥ ខែ តុលា ដោយសារអគ្គិភ័យឆាបឆេះអាងស្តុកប្រេងនៅស្ថានីយ៍ប្រេង La Salina នៅប្រទេសវេណេស៊ុយអេឡា ដែលដំណើរការដោយក្រុមហ៊ុនរដ្ឋ Petróleos de Venezuela (PDVSA)។

អគ្គិភ័យបានឆាបឆេះនៅពេលព្រឹកព្រលឹម អំឡុងពេលមានព្យុះ ហើយបានឆេះរាលដាលរហូតដល់ពេលល្ងាច។ ទីតាំងដែលក្រុមហ៊ុនប្រេងប្រើប្រាស់ ភាគច្រើនសម្រាប់ការផ្ទេរប្រេងឆៅ និងប្រេងឥន្ធនៈរវាងកំពង់ផែក្នុងស្រុក ដែលមានទីតាំងនៅជិតទីក្រុង Cabimas ភាគខាងលិច។

អគ្គិភ័យ ការដាច់ចរន្តអគ្គិសនី និងឧបទ្ទវហេតុផ្សេងទៀត គឺជារឿងធម្មតានៅក្នុងទីតាំងរបស់ក្រុមហ៊ុនប្រេងរដ្ឋ PDVSA ដោយសារស្ថានភាពមិនល្អប្រសើរនៃកន្លែងផលិតប្រេង រោងចក្រចម្រាញ់ប្រេង ស្ថានីយស្តុកប្រេង បំពង់បង្ហូរប្រេង និងនាវាដឹកប្រេង។ វាជារឿយៗធ្វើឲ្យរំខានដល់ប្រតិបត្តិការ។