យោងតាមរបាយការណ៍ថ្មីមួយដែលចេញផ្សាយកាលពីថ្ងៃអង្គារដោយធនាគារអភិវឌ្ឍន៍អាស៊ី (ADB) និងមជ្ឈមណ្ឌលតាមដានការជម្លៀសខ្លួនខាងក្នុងប្រទេស បានឲ្យដឹងថា គ្រោះមហន្តរាយសកលនៅឆ្នាំ២០២៣ មានចំនួនជនភៀសខ្លួនច្រើនជាង ជម្លោះ និងអំពើហិង្សា។

របាយការណ៍ដែលមានចំណងជើងថា «ការផ្តល់ហិរញ្ញវត្ថុអភិវឌ្ឍន៍សម្រាប់ដំណោះស្រាយចំពោះការជម្លៀសខ្លួននៅក្នុងបរិបទនៃគ្រោះមហន្តរាយ និងបម្រែបម្រួលអាកាសធាតុនៅអាស៊ី និងប៉ាស៊ីហ្វិក» បាននិយាយថា កាលពីឆ្នាំមុន ជនភៀសខ្លួនខាងក្នុងប្រទេសមានចំនួន២៦,៤លាននាក់ ឬផ្លាស់ប្តូរទីលំនៅដោយបង្ខំនៅក្នុងប្រទេសមួយ គឺបណ្តាលមកពីគ្រោះមហន្តរាយ បើប្រៀបធៀបទៅនឹងអ្នកភៀសខ្លួនចំនួន២០,៥លាន បង្កឡើងដោយជម្លោះ និងអំពើហិង្សា។

របាយការណ៍ បានរកឃើញថាការភៀសខ្លួនដោយគ្រោះមហន្តរាយភាគច្រើន ត្រូវបានកត់ត្រាទុកជាសកលក្នុងរយៈពេល១០ឆ្នាំចុងក្រោយនេះ ដែលបានកើតឡើងនៅអាស៊ី និងប៉ាស៊ីហ្វិក ដោយមានអ្នកជម្លៀសខ្លួននៅខាងក្នុងប្រទេសចំនួន១៧៧លាននាក់ ត្រូវបានរាយការណ៍ក្នុងអំឡុងឆ្នាំ ២០១៤ ដល់ឆ្នាំ២០២៣។

របាយការណ៍នេះ បានព្រមានថា ផលប៉ះពាល់នៃបម្រែបម្រួលអាកាសធាតុ ទំនងជានឹងបង្កើនចំនួន រយៈពេល និងភាពធ្ងន់ធ្ងរនៃការជម្លៀសខ្លួន នៅនៅទូទាំងពិភពលោក។

របាយការណ៍ បានលើកឡើងពីវិធីមួយចំនួនដែលហិរញ្ញវត្ថុអភិវឌ្ឍន៍ អាចត្រូវបានប្រើប្រាស់ដើម្បីទប់ស្កាត់ និងឆ្លើយតបទៅនឹងការជម្លៀសខ្លួន។

ធនាគារអភិវឌ្ឍន៍ពហុភាគី អាចគាំទ្រ និងជំរុញដល់គោលនយោបាយ និងការវិនិយោគដែលរួមបញ្ចូលការជម្លៀសខ្លួន ធ្វើឲ្យប្រព័ន្ធទិន្នន័យជាតិកាន់តែប្រសើរ និងបង្កើនការយល់ដឹងសម្រាប់ប្រទេសនានា ដើម្បីរួមបញ្ចូលការភៀសខ្លួនចូលទៅក្នុងយុទ្ធសាស្ត្រអភិវឌ្ឍន៍របស់ពួកគេ។ របាយការណ៍ ក៏បានអំពាវនាវឱ្យមានវិធីសាស្រ្តគ្រប់ជ្រុងជ្រោយ ដែលទទួលស្គាល់កាន់តែច្បាស់ពីភាពស្មុគស្មាញនៃការភៀសខ្លួន ដែលកំពុងកើតឡើងនៅក្នុងបរិបទនៃបម្រែបម្រួលអាកាសធាតុ។