ប្រធានាធិបតីអេហ្ស៊ីបលោក អាប់ដែល ហ្វាតា អាល់ស៊ីស៊ី ( Abdel-Fattah al-Sisi) និងព្រះអង្គម្ចាស់អារ៉ាប៊ីសាអ៊ូឌីតដែលកំពុងបំពេញព្រះរាជទស្សនកិច្ច និងនាយករដ្ឋមន្ត្រី ម៉ូហាម៉េដា ប៊ីន សាលម៉ាន អាល់ស៊ូដ (Mohammed bin Salman Al Saud)កាលពីថ្ងៃអង្គារ បានព្រមានអំពីភាពធ្ងន់ធ្ងរនៃស្ថានការណ៍ក្នុងតំបន់ ដោយអំពាវនាវឲ្យបន្ធូរបន្ថយភាពតានតឹងក្នុងតំបន់។

ការិយាល័យប្រធានាធិបតីអេហ្ស៊ីប បាននិយាយនៅក្នុងសេចក្តីថ្លែងការណ៍មួយថា ពួកគេ បានធ្វើការអត្ថាធិប្បាយក្នុងអំឡុងពេលកិច្ចប្រជុំមួយ នៅក្នុងរដ្ឋធានីនៃប្រទេសអេហ្ស៊ីប។

ការពិភាក្សា ក៏បានលើកឡើងពីការវិវឌ្ឍនៅក្នុងតំបន់ ជាពិសេសស្ថានភាពនៅតំបន់ហ្កាហ្សាស្ទ្រីប និងប្រទេសលីបង់។ មេដឹកនាំទាំងពីរ បានសង្កត់ធ្ងន់ថា ការបង្កើតរដ្ឋប៉ាឡេស្ទីនដែលមានអធិបតេយ្យភាព ស្របតាមដំណោះស្រាយស្របច្បាប់អន្តរជាតិ គឺជាផ្លូវតែមួយគត់ ដើម្បីសម្រេចបានបទឈប់បាញ់ប្រកបដោយនិរន្តរភាព សន្តិភាព និងសន្តិសុខក្នុងតំបន់។

ពួកគេបានចង្អុលបង្ហាញថា ការប៉ុនប៉ងដើម្បីរំលាយបុព្វហេតុប៉ាឡេស្ទីន នឹងនាំទៅដល់ការបន្តជម្លោះ ក្នុងតំបន់ ដោយអំពាវនាវឲ្យមានជំហានឆ្ពោះទៅរកការកាត់បន្ថយភាពតានតឹង រួមទាំងបទឈប់បាញ់នៅតំបន់ហ្កាហ្សាស្ទ្រីប និងលីបង់ ក៏ដូចជាការដោះស្រាយស្ថានភាពមនុស្សធម៌ដែលកាន់តែអាក្រក់ និងបញ្ឈប់គោលនយោបាយដែលជំរុញឲ្យតំបន់នេះ ឈានដល់កម្រិតនៃជម្លោះបន្ថែមទៀត។

ពួកគេ ក៏បានអះអាងជាថ្មីអំពីភាពចាំបាច់នៃការគោរពអធិបតេយ្យភាព សន្តិសុខ ស្ថិរភាព និងបូរណភាពទឹកដីរបស់ប្រទេសលីបង់។

មេដឹកនាំទាំងពីរ ក៏បានពិភាក្សាគ្នាអំពីបញ្ហាក្នុងតំបន់មួយចំនួន ដោយផ្តោតលើសន្តិសុខនៃតំបន់សមុទ្រក្រហម ក៏ដូចជាស្ថានភាពនៅស៊ូដង់ លីប៊ី និងស៊ីរី។