ប្រភពរុស្ស៊ីបានប្រាប់ថា កងកម្លាំងបានដណ្តើមបានវិញនូវទីតាំង ក្នុងតំបន់ ហើយអ្នកជំនាញម្នាក់អះអាងថា «អ៊ុយក្រែនកំពុងនៅលើមាត់ជ្រោះនៃការចាញ់សង្រ្គាម»។ ប្រភពនោះបាននិយាយថា អ៊ុយក្រែនបានជួបនឹងការបាត់បង់ដ៏ធំ នៅសមរភូមិជួរមុខ ក្នុងតំបន់ Kursk របស់ប្រទេសរុស្ស៊ី ខណៈដែលលោក Vladimir Putin ប្ដេជ្ញាធ្វើអ្វីៗគ្រប់យ៉ាងដែលលោកអាចធ្វើបាន នៅសមរភូមិ ដើម្បីវាយរុញច្រានការលុកលុយនោះ។

ប្រភពពីរុស្ស៊ីទាំងនោះបានអះអាងថា កងកម្លាំងរុស្ស៊ីដណ្តើមបានទីតាំង នៅតំបន់ Kursk Oblast។ ហើយបានបន្ថែមថា ទាហានរបស់លោក Putin ក៏បានធ្វើការវាយលុកលើទិសដៅ នៅទីក្រុង Kurakhove និងបានរុលទៅមុខ នៅភាគឦសានទីក្រុង Vuhledar ក្នុងតំបន់ Donetsk របស់អ៊ុយក្រែន។ ជាមួយនឹងស្ថានភាព នៅសមរភូមិជួរមុខជាច្រើននេះ វាបានជំរុញឲ្យមានការភ័យខ្លាចពីការមានមហន្តរាយ នៅអ៊ុយក្រែន។

ប្រភពពីផ្នែកការពារជាតិម្នាក់ បានប្រាប់សារព័ត៌មាន Daily Express ថា៖ «ខ្ញុំកំពុងនិយាយទៅកាន់មន្ត្រីយោធាអង់គ្លេសជាន់ខ្ពស់ម្នាក់ នៅថ្ងៃនេះ។ លោកបានប្រាប់ខ្ញុំថា អ៊ុយក្រែន កំពុងទៅកៀកនឹងមាត់ជ្រោះនៃការចាញ់សង្រ្គាមជាមួយរុស្ស៊ីហើយ។ វាជារឿងធ្ងន់ធ្ងរណាស់»។

ដោយឡែក វិទ្យាស្ថានសម្រាប់ការសិក្សាពីសង្គ្រាម (ISW) ជាស្ថាប័នស្រាវជ្រាវឈានមុខគេមានមូលដ្ឋាននៅទីក្រុងវ៉ាស៊ីនតោនដែលគ្របដណ្តប់លើជម្លោះ ក៏បានផ្តល់បច្ចុប្បន្នភាពថ្មីផងដែរ អំពីស្ថានភាពនៅតំបន់ Kursk ។ តាមរយៈការសរសេរនៅលើបណ្ដាញសង្គម X វិទ្យាស្ថាន ISW បានឲ្យដឹងថា៖ «ប្រភពរុស្ស៊ីបានអះអាងថា កងកម្លាំងរុស្ស៊ីដណ្តើមបានវិញនូវទីតាំង ក្នុងតំបន់ Kursk Oblast។ ថ្មីៗនេះ កងកម្លាំងអ៊ុយក្រែនបានដណ្តើមគ្រប់គ្រងលើទីតាំង នៅភាគកណ្តាលទីក្រុង Toretsk»។

ជាមួយគ្នានេះដែរ រូបថតថ្មីដ៏គួរឲ្យភ្ញាក់ផ្អើល ក៏បានលេចចេញមកផងដែរ បន្ទាប់ពីការវាយប្រហារដោយរ៉ូកែតរុស្ស៊ីដ៏ឃោរឃៅទៅលើប្រទេសអ៊ុយក្រែន បានធ្វើឲ្យទីក្រុងមួយមានអណ្ដាតភ្លើងឆាបឆេះយ៉ាងសន្ធោសន្ធៅ។ ហើយមីស៊ីលដែលបានបាញ់ទៅទីក្រុង Mykolaiv ភាគខាងត្បូង បានសម្លាប់មនុស្សម្នាក់ និងរបួស ១៦នាក់ទៀត កាលពីព្រឹកព្រលឹមថ្ងៃអង្គារ (ទី១៥ ខែតុលា)៕