បេសកជនពិសេសរបស់អង្គការសហប្រជាជាតិ ប្រចាំនៅយេម៉ែន បាននិយាយកាលពីថ្ងៃអង្គារ (ទី១៥ ខែតុលា) ថា ប្រទេសក្រីក្របំផុតរបស់ពិភពអារ៉ាប់មួយនេះ ប្រឈមនឹងត្រូវបានអូសទាញឲ្យចូលទៅក្នុងការកើនឡើងនូវភាពតានតឹងផ្នែកយោធា នៅតំបន់មជ្ឈិមបូព៌ា ដែលបន្តមានកម្ដៅខ្លាំងឡើងៗ ហើយអាចរាលដាលរហូតលែងគ្រប់គ្រងបាន។

លោក Hans Grundberg បានប្រាប់ក្រុមប្រឹក្សាសន្តិសុខអង្គការសហប្រជាជាតិ (UNSC) ថា ជារឿងគួរឲ្យសោកស្ដាយណាស់ដែលប្រទេសយេម៉ែនជាផ្នែកមួយនៃការកើនឡើងនូវភាបតានតឹងនេះ ហើយលោកបានព្រមានថា ការវាយប្រហារម្តងហើយម្តងទៀតលើការដឹកជញ្ជូនអន្តរជាតិដោយក្រុមឧទ្ទាមហ៊ួទីរបស់ប្រទេសនេះ «បានបង្កើនហានិភ័យកាន់តែខ្លាំងឡើងពីការមានគ្រោះមហន្តរាយដល់បរិស្ថាន» នៅក្នុងសមុទ្រក្រហម។

ទាំងលោក Grundberg និងប្រធានផ្នែកមនុស្សធម៌ស្តីទីរបស់ UN លោកស្រី Joyce Msuya បានជំរុញឲ្យក្រុមហ៊ួទីគាំទ្រដោយអ៊ីរ៉ង់បញ្ឈប់ការវាយប្រហាររបស់ពួកគេលើការដឹកជញ្ជូនអន្តរជាតិ ដែលក្រុមឧទ្ទាមបានចាប់ផ្តើមធ្វើបែបនេះ ដើម្បីគាំទ្រក្រុមសកម្មប្រយុទ្ធដែលគាំទ្រដោយអ៊ីរ៉ង់ដែរ គឺក្រុមហាម៉ាស បន្ទាប់ពីមានការវាយប្រហារកាលពីថ្ងៃទី៧ ខែតុលា ឆ្នាំ២០២៣ នៅប្រទេសអ៊ីស្រាអែល រហូតនាំឲ្យអ៊ីស្រាអែលធ្វើសង្គ្រាមសងសឹក ដែលបន្តមានមិនទាន់ចប់ នៅតំបន់ហ្កាហ្សា។

ហើយជាមួយគ្នានេះដែរ មន្ត្រី UN ក៏បានទាមទារឲ្យមានការដោះលែងបុគ្គលិករាប់សិបនាក់របស់ UN បុគ្គលិកនៃអង្គការមិនមែនរដ្ឋាភិបាល និងបេសកកម្មការទូត ហើយនិងសមាជិកនៃសង្គមស៊ីវិល ដែលភាគច្រើនត្រូវបានឃុំខ្លួនតាំងពីខែមិថុនាមក៕