​

រដ្ឋាភិបាលប្រទេសវេណេស៊ុយអេឡា កាលពីថ្ងៃអង្គារ បានច្រានចោលយ៉ាងដាច់ខាតចំពោះសេចក្តីថ្លែងការណ៍កាលពីពេលថ្មីៗនេះរបស់រដ្ឋមន្ត្រីការបរទេសសហរដ្ឋអាមេរិក លោក Antony Blinken ទាក់ទងនឹងកិច្ចការផ្ទៃក្នុងរបស់ប្រទេសអាមេរិកខាងត្បូងមួយនេះ។

ក្រសួងការបរទេសវ៉េណេស៊ុយអេឡា និយាយនៅក្នុងសេចក្តីថ្លែងការណ៍ថា លោក Blinken ប្រកាន់យកការធ្វើអត្ថាធិប្បាយក្លែងក្លាយ និងគ្មានប្រភពច្បាស់លាស់ប្រឆាំងនឹងឆន្ទៈរបស់ប្រជាជនវេណេស៊ុយអេឡា ហើយ បានទទូចលើការសមគំនិតរបស់លោក ជាមួយក្រុមជ្រុលនិយមហិង្សា ។

មន្ត្រីសហរដ្ឋអាមេរិក បាននិយាយថា វាជារឿងចាំបាច់ដែលការបោះឆ្នោតរបស់ប្រជាជនវេណេស៊ុយអេឡា ត្រូវបានគោរពយ៉ាងពិតប្រាកដ ដោយនិយាយយោងទៅលើលទ្ធផលនៃការបោះឆ្នោតប្រធានាធិបតី កាលពីថ្ងៃទី២៨ ខែកក្កដា របស់ប្រទេសវេណេស៊ុយអេឡា។ 

ជាការឆ្លើយតប ក្រសួងការបរទេសវ៉េណេស៊ុយអេឡា បាននិយាយថា ការជាប់ឆ្នោតជាថ្មីមួយអាណត្តិទៀតរបស់ប្រធានាធិបតីវេណេស៊ុយអេឡា លោក Nicolas Maduro គឺជាការបង្ហាញពីការគាំទ្រដ៏ពេញនិយម ដែលពេញចិត្តដោយបដិវត្តន៍បូលីវ៉ា។

ក្រសួង ក៏បានរិះគន់ការប្រព្រឹត្ត «អាណានិគមនិយមបែបថ្មី» របស់រដ្ឋាភិបាលសហរដ្ឋអាមេរិក សម្រាប់ការបម្រើជា «មូលដ្ឋាននៃការគាំទ្រសម្រាប់ក្រុមហ្វាស៊ីសនិយមក្នុងស្រុក» ដែលប៉ុនប៉ងធ្វើឱ្យអន្តរាយដល់ស្ថាប័ននានារបស់ប្រទេសវេណេស៊ុយអេឡា។ វ៉េណេស៊ុយអេឡា បានជំរុញឱ្យរដ្ឋាភិបាលសហរដ្ឋអាមេរិក ដោះស្រាយបញ្ហាធ្ងន់ធ្ងរដែលខ្លួនកំពុងប្រឈមមុខ ហើយបញ្ឈប់រាល់ការជ្រៀតជ្រែកឥតឈប់ឈរទាំងអស់របស់ខ្លួន នៅក្នុងកិច្ចការរបស់ប្រជាជនវេណេស៊ុយអេឡា។