ប្រទេសអូស្ត្រាលីបានឲ្យដឹងនៅថ្ងៃពុធ (ទី១៦ ខែតុលា) នេះថា ខ្លួននឹងបណ្តាក់ទុនរាប់ពាន់លានដុល្លារក្នុងរយៈពេល ២ទសវត្សរ៍ខាងមុខ ដើម្បីពង្រីករោងចក្រផលិតនាវា នៅភាគខាងលិចអូស្ត្រាលី ដែលនឹងក្លាយជាមជ្ឈមណ្ឌលថែទាំ សម្រាប់កងនាវាមុជទឹករបស់ខ្លួន ដើរដោយថាមពលនុយក្លេអ៊ែររបស់សម្ព័ន្ធ AUKUS។

រដ្ឋមន្ត្រីការពារជាតិ លោក Richard Marles បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលនឹងធ្វើការវិនិយោគដំបូងចំនួន ១២៧លានដុល្លារអូស្ត្រាលី (៨៥លានដុល្លារ) ក្នុងរយៈពេល ៣ឆ្នាំ ដើម្បីកែលម្អគ្រឿងបរិក្ខារ នៅឯរោងចក្រផលិតនាវា Henderson ក្បែរទីក្រុង Perth។

លោក Marles បាននិយាយថា៖ «តំបន់ការពារជាតិ នៅ Henderson នឹងធ្វើឲ្យប្រសើរឡើងដល់ឧស្សាហកម្មផលិតនាវា និងនិរន្តរភាពរបស់អូស្ត្រាលី ខណៈពេលដែលគាំទ្រដល់ការកសាងនាវាកងទ័ពជើងទឹកជាបន្តបន្ទាប់ នៅភាគខាងលិចអូស្ត្រាលី និងផ្លូវនាវាមុជទឹកដើរដោយថាមពលនុយក្លេអ៊ែររបស់អូស្ត្រាលី»។

គួរបញ្ជាក់ថា កតិកាសញ្ញាការពារជាតិ AUKUS ដែលបានចុះហត្ថលេខាក្នុងឆ្នាំ២០២១ រវាងអូស្ត្រាលី អង់គ្លេស និងសហរដ្ឋអាមេរិក នឹងឃើញអូស្ត្រាលីទិញនាវាមុជទឹកដើរដោយថាមពលនុយក្លេអ៊ែរចំនួន ៥ ពីទីក្រុងវ៉ាស៊ីនតោន នៅដើមទសវត្សរ៍ឆ្នាំ២០៣០ មុនពេលរួមគ្នាសាងសង់ និងប្រតិបត្តិការលំដាប់ថ្នាក់ថ្មី SSN-AUKUS ជាមួយចក្រភពអង់គ្លេស ប្រហែល ១ទសវត្សរ៍ក្រោយ៕