របាយការណ៍របស់សហព័ន្ធ បានបង្ហាញកាលពីថ្ងៃអង្គារ (ទី១៥ ខែតុលា) ថា លោក Elon Musk បានផ្តល់ប្រាក់ប្រមាណជា ៧៥លានដុល្លារអាមេរិកដល់ក្រុមយុទ្ធនាការរបស់លោក Donald Trump រយៈពេល ៣ខែ ដោយនេះបានគូសបញ្ជាក់អំពីថា តើមហាសេដ្ឋីរូបនេះក្លាយជាផ្នែកសំខាន់យ៉ាងដូចម្ដេច ចំពោះកិច្ចខិតខំប្រឹងប្រែងរបស់បេក្ខជនគណបក្សសាធារណរដ្ឋ ដើម្បីឈ្នះការបោះឆ្នោតប្រធានាធិបតីអាមេរិកថ្ងៃទី៥ ខែវិច្ឆិកា។

បើយោងតាមរបាយការណ៍ដែលបានដាក់ទៅគណៈកម្មការរៀបចំការបោះឆ្នោតសហព័ន្ធ បានឲ្យដឹងថា America PAC (គណៈកម្មាធិការសកម្មភាពនយោបាយអាមេរិក) ដែលផ្តោតលើការទាក់ទាញអ្នកបោះឆ្នោត នៅក្នុងរដ្ឋមានការប្រកួតប្រជែងយ៉ាងស្វិតស្វាញ ដែលអាចសម្រេចចិត្តបោះឆ្នោត បានចំណាយប្រហែល ៧២លានដុល្លារនៃចំនួននោះ នៅក្នុងខែកក្កដា ដល់ខែកញ្ញានេះ។

ចំនួននោះ គឺច្រើនជាងការចំណាយរបស់ PAC គាំទ្រលោក Trump ផ្សេងទៀត ដែលផ្តោតលើការទាក់ទាញអ្នកបោះឆ្នោត។ ក្រុមយុទ្ធនាការរបស់លោក Trump គឺពឹងផ្អែកយ៉ាងទូលំទូលាយលើក្រុមខាងក្រៅ សម្រាប់ការឃោសនាបោះឆ្នោត ដោយមានន័យថា ក្រុម Super PAC បង្កើតឡើងដោយលោក Musk ដែលជាបុគ្គលមានជាងគេបំផុតលើពិភពលោកនោះ ដើរតួនាទីយ៉ាងសំខាន់នៅក្នុងការបោះឆ្នោតដ៏ស្វិតស្វាញ រវាងលោក Trump និងលោកស្រី Kamala Harris របស់គណបក្សប្រជាធិបតេយ្យ។

លោក Musk ដែលបាននិយាយថា លោកបានបោះឆ្នោតឲ្យបេក្ខជនប្រធានាធិបតីខាងគណបក្សប្រជាធិបតេយ្យ នាពេលកន្លងមក បានប្ដូរការប្រកាន់នយោបាយភ្លាមៗ នៅក្នុងការបោះឆ្នោតនេះ។ លោកបានគាំទ្រលោក Trump ក្នុងខែកក្កដា ហើយបានបង្ហាញខ្លួនជាមួយអតីតប្រធានាធិបតីរូបនេះ នៅឯការជួបជុំមួយ ក្នុងរដ្ឋ Pennsylvania កាលពីដើមខែតុលា។ ការបរិច្ចាគរបស់លោកទៅឲ្យ America PAC រុញឲ្យលោកចូលទៅក្នុងក្រុមផ្ដល់ជំនួយផ្តាច់មុខរបស់បក្សសាធារណរដ្ឋ ជាបញ្ជីឈ្មោះដែលមានរួមបញ្ចូលផងដែរនូវទាយាទធនាគារ លោក Timothy Mellon និងមហាសេដ្ឋីកាស៊ីណូ លោកស្រី Miriam Adelson៕