អ្នកការទូតជាន់ខ្ពស់អ៊ុយក្រែនម្នាក់បាននិយាយថា ប្រទេសអ៊ុយក្រែនកំពុងស្នើសុំឲ្យបានក្លាយជាសមាជិករបស់អង្គការសន្ធិសញ្ញាអាត្លង់ទិកខាងជើង (NATO) មុនពេលលោក Joe Biden ចាកចេញពីសេតវិមាន ដោយលើកហេតុផលថា ការទទួលបានការអញ្ជើញជាផ្លូវការ នឹងក្លាយកេរដំណែលដ៏ស័ក្ដិសមរបស់លោកប្រធានាធិបតីអាមេរិករូបនេះ។

លោកស្រី Nataliia Galibarenko ឯកអគ្គរដ្ឋទូតរបស់ទីក្រុងគីវ ប្រចាំនៅអង្គការណាតូ បានប្រាប់សារព័ត៌មាន Reuters ថា៖ «គំនិតរបស់យើង គឺថា ការផ្ដល់ឲ្យអ៊ុយក្រែននូវការអញ្ជើញផ្លូវការ (មួយ) នាពេលនេះ គឺជាសញ្ញានយោបាយដ៏ល្អ»។ ក្នុងបទសម្ភាសន៍មួយ នៅឯបេសកកម្មរបស់អ៊ុយក្រែន ប្រចាំនៅអង្គការណាតូ ដែលនៅម្ខាងនៃទីស្នាក់កណ្ដាលរបស់សម្ព័ន្ធមិត្ត លោកស្រី Galibarenko បាននិយាយថា៖ «យើងជឿជាក់ដោយស្មោះថា វាអាចជាផ្នែកមួយនៃកេរដំណែលរបស់រដ្ឋបាលអាមេរិកបច្ចុប្បន្ន»។

យ៉ាងណាក្ដី ការបោះឆ្នោតប្រធានាធិបតីអាមេរិក នាខែក្រោយ បង្កើតបាននូវភាពមិនច្បាស់លាស់យ៉ាងខ្លាំង សម្រាប់អ៊ុយក្រែន ខណៈដែលទីក្រុងវ៉ាស៊ីនតោន គឺជាអ្នកផ្តល់ជំនួយយោធាដ៏ធំបំផុតរបស់ទីក្រុងគីវ សម្រាប់សង្គ្រាមប្រឆាំងនឹងការលុកលុយរបស់រុស្ស៊ី។

ហើយបើទោះបីជាអនុប្រធានាធិបតី លោកស្រី Kamala Harris របស់បក្សប្រជាធិបតេយ្យ បានបង្ហាញសញ្ញាបន្តការគាំទ្រដល់អ៊ុយក្រែនក៏ដោយ ក៏លោកស្រីមិនបានបញ្ជាក់ពីកម្រិតនៃការគាំទ្រនោះដែរ។ ក្នុងពេលជាមួយគ្នា អតីតប្រធានាធិបតីគណបក្សសាធារណរដ្ឋ លោក Donald Trump មិនបានបង្ហាញភាពច្បាស់លាស់ អំពីរបៀបដែលលោកនឹងដោះស្រាយសង្រ្គាមនេះនោះទេ។

ប្រធានាធិបតីអ៊ុយក្រែន លោក Volodymyr Zelenskiy បានបញ្ជាក់យ៉ាងច្បាស់ នៅក្នុងប៉ុន្មានសប្តាហ៍ថ្មីៗនេះថា លោកមើលឃើញការអញ្ជើញផ្លូវការរបស់អង្គការណាតូយ៉ាងឆាប់រហ័សថា ជាផ្នែកមួយនៃ «ផែនការជ័យជម្នះ» របស់លោក។

គួរបញ្ជាក់ថា អង្គការណាតូ បានប្រកាសថា អ៊ុយក្រែននឹងចូលរួមក្នុងជួររបស់ខ្លួន ហើយដំណើរផ្លូវឆ្ពោះទៅកាន់សម្ព័ន្ធភាព គឺពុំមានភាពប្រែប្រួលនោះឡើយ។ ប៉ុន្តែប្លុកនេះបាននិយាយថា ទីក្រុងគីវមិនអាចចូលរួមក្នុងពេលមានសង្គ្រាមបែបនេះបានទេ ហើយបានបដិសេធមិនកំណត់ពេលវេលាលើសមាជិកភាពនេះឡើយ៕