ប្រព័ន្ធផ្សព្វផ្សាយរដ្ឋ បានរាយការណ៍ថា នាយករដ្ឋមន្ត្រីចិន លោក Li Qiang បានលើកឡើងពីទំនាក់ទំនងយ៉ាងជិតស្និទ្ធ ៣ភាគី ជាមួយរុស្ស៊ី និងម៉ុងហ្គោលី នៅក្នុងកិច្ចប្រជុំមួយ នាថ្ងៃពុធ (ទី១៦ ខែតុលា) នេះ ជាមួយសមភាគីមកពីប្រទេសជិតខាងទាំង២ ដែលធ្វើឡើងនៅខាងក្រៅកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO)។

ប្រទេសទាំង៣ បានកាន់តែមានភាពជិតស្និទ្ធជាមួយគ្នា ក្នុងរយៈពេលប៉ុន្មានឆ្នាំចុងក្រោយនេះ ដោយទាំងប្រទេសចិន និងម៉ុងហ្គោលី បានក្រាលកម្រាលព្រំក្រហមនៅឆ្នាំនេះ ដើម្បីស្វាគមន៍ប្រធានាធិបតីរុស្ស៊ី លោក Vladimir Putin ដូចដែលទីក្រុងមូស្គូបានធ្វើបែបហ្នឹង ពេលទទួលមេដឹកនាំចិន លោក ស៊ី ជីនពីង (Xi Jinping) ក្នុងឆ្នាំ២០២៣ មុនពេលដែលបន្ទាប់មក ទីក្រុងប៉េកាំងធ្វើជាម្ចាស់ផ្ទះទទួលប្រធានាធិបតីម៉ុងហ្គោលី។

យោងតាមទីភ្នាក់ងារព័ត៌មានចិន Xinhua បានឲ្យដឹងថា លោក Li ដែលជាមន្ដ្រីលំដាប់ទី២ របស់ចិន បាននិយាយថា៖ «ប្រទេសចិនបានត្រៀមរួចជាស្រេច ដើម្បីធ្វើការជាមួយប្រទេសរុស្ស៊ី និងម៉ុងហ្គោលី ដើម្បីលើកកម្ពស់ការជឿទុកចិត្តគ្នាទៅវិញទៅមក ពង្រឹងកិច្ចសហប្រតិបត្តិការ និងជំរុញកិច្ចសហប្រតិបត្តិការត្រីភាគីឲ្យកាន់តែស៊ីជម្រៅ»។

គួរបញ្ជាក់ថា លោក Li កំពុងនិយាយទៅកាន់នាយករដ្ឋមន្ត្រីរុស្ស៊ី លោក Mikhail Mishustin និងនាយករដ្ឋមន្ត្រីម៉ុងហ្គោលីលោក L. Oyun-Erdene៕