នៅថ្ងៃពុធនេះ សហរដ្ឋអាមេរិក កូរ៉េខាងត្បូង និងជប៉ុន បានប្រកាសដាក់ចេញក្រុមចម្រុះជាតិសាសន៍ថ្មី ដើម្បីតាមដានការពង្រឹងទណ្ឌកម្មលើកូរ៉េខាងជើង ក្រោយរុស្ស៊ី និងចិន រារាំងសកម្មភាពតាមដានមួយនេះ នៅអង្គការសហប្រជាជាតិ(UN) ។

យន្តការថ្មីដែលជាក្រុមតាមដានទណ្ឌកម្មចម្រុះជាតិសាសន៍ ត្រូវបានណែនាំ ក្រោយកាលពីខែមីនា រុស្ស៊ី បានច្រានចោលការបន្តប្រចាំឆ្នាំនូវក្រុមអ្នកជំនាញ UNដែលបានត្រួតពិនិត្យការអនុវត្តទណ្ឌកម្មរយៈពេល ១៥ឆ្នាំកន្លងមកនេះ ដែលមានគោលដៅទប់ស្កាត់កម្មវិធីមីស៊ីល និងនុយក្លេអ៊ែររបស់កូរ៉េខាងជើង ។ ចិនបានអនុប្បវាទការបោះឆ្នោត ។

មន្រ្តីមួយរូបរបស់កូរ៉េខាងត្បូង និយាយថា ក្រុមមួយនេះគឺមានន័យថាបន្តការងារក្រុមអ្នកជំនាញ UN រួមទាំងការចេញរបាយការណ៍ទៀងទាត់លើការពង្រឹងទណ្ឌកម្ម ហើយនិងពាក់ព័ន្ធជាមួយការចូលរួមរបស់ប្រទេសផ្សេងទៀត រួមទាំងប្រទេសអង់គ្លេស បារាំង និងអាល្លឺម៉ង់ ។

ការដាក់ចេញនេះដែរ ត្រូវបានប្រកាសឲ្យដឹងនៅក្នុងសន្និសីទសារព័ត៌មានរួមគ្នានៅក្នុងទីក្រុងសេអ៊ូល ដោយអនុរដ្ឋលេខាធិការក្រសួងការបរទេសសហរដ្ឋអាមេរិកលោក Kurt Campbell អនុរដ្ឋមន្រ្តីក្រសួងការបរទេសកូរ៉េខាងត្បូងលោក Kim Hong-kyun និងអនុរដ្ឋមន្រ្តីក្រសួងការបរទេសជប៉ុនលោក Masataka Okano ជមួយនឹងឯកអគ្គរដ្ឋទូតរបស់ប្រទេសចំនួន ៨ មុនកិច្ចប្រជុំរបស់ពួកគេនៅក្នុងទីក្រុងសេអ៊ូល ។

ទីក្រុងវ៉ាស៊ីងតោន និងទីក្រុងសេអ៊ូល និយាយថា កូរ៉េខាងជើង និងរុស្ស៊ី បានធ្វើកិច្ចការជំនួញយោធាដោយខុសច្បាប់ ។

ទោះបីជាយ៉ាងណាក៏ដោយ ទីក្រុងព្យុងយ៉ាង និងទីក្រុងម៉ូស្គូ បានធ្វើការច្រានចោលការផ្ទេរអាវុធ ប៉ុន្តែពួកគេសន្យាពង្រឹងទំនាក់ទំនងយោធា ជាមួយនឹងការសម្រេចបានកិច្ចព្រមព្រៀងការពារជាតិទៅវិញទៅមក នៅក្នុងកិច្ចប្រជុំកំពូលកាលពីខែមិថុនា ៕