ទីភ្នាក់ងារជំនួយជនភៀសខ្លួនប៉ាឡេស្ទីនរបស់អង្គការសហប្រជាជាតិ ហៅកាត់ថា UNRWA ជិតដល់ពេលវេលាដែលអាចដួលរលំហើយ សម្រាប់ប្រតិបត្តិការរបស់ខ្លួន នៅក្នុងតំបន់ហ្កាហ្សាស្ទ្រីប ដោយសារតែស្ថានភាពកាន់តែស្មុគស្មាញខ្លាំងឡើងៗ។ នេះបើតាមការឲ្យដឹងពីប្រមុខរបស់ទីភ្នាក់ងារនេះ នាថ្ងៃពុធ (ទី១៦ ខែតុលា) នេះ។

ក្នុងសន្និសីទសារព័ត៌មាន នៅទីក្រុងប៊ែរឡាំង ប្រទេសអាល្លឺម៉ង់ ប្រមុខ UNRWA លោក Philippe Lazzarini បានប្រាប់អ្នកសារព័ត៌មានថា៖ «ខ្ញុំនឹងមិនលាក់លៀមការពិត ដែលថា យើងអាចនឹងឈានដល់ចំណុច ដែលយើងនឹងមិនអាចដំណើរការបានទៀតទេ។ យើងខិតកាន់តែកៀកនឹងការដួលរលំដែលអាចកើតមានហើយ។ តែបើសួរថា តើនៅពេលណា? ខ្ញុំមិនដឹងនោះទេ។ ប៉ុន្តែយើងកំពុងទៅកាន់តែកៀកខ្លាំងណាស់ហើយ»។

លោកបាននិយាយថា ទីភ្នាក់ងារនេះកំពុងជួបប្រទះនឹងវិបត្តិចម្រុះ ដែលមានទាំងការគំរាមកំហែងផ្នែកហិរញ្ញវត្ថុ និងនយោបាយ ចំពោះអត្ថិភាពរបស់ខ្លួន បន្ថែមពីលើការលំបាក ក្នុងប្រតិបត្តិការប្រចាំថ្ងៃ ដោយសារជំនួយ គឺកាន់តែត្រូវការជាចាំបាច់ ដើម្បីទប់ទល់នឹងការគំរាមកំហែងពីជំងឺ និងទុរ្ភិក្ស។

ហើយលោកបានបន្ថែមថា ខណៈជិតឈានចូលដល់រដូវរងា ដោយប្រព័ន្ធភាពស៊ាំរបស់មនុស្សចុះខ្សោយ មានហានិភ័យយ៉ាងពិតប្រាកដ ដែលគ្រោះទុរ្ភិក្ស ឬកង្វះអាហារូបត្ថម្ភធ្ងន់ធ្ងរ អាចក្លាយជាបញ្ហាមួយខ្ពស់៕