យោងតាមការអះអាងរបស់ក្រសួងសុខាភិបាលប៉ាឡេស្ទីន បានឲ្យដឹងថា ការវាយប្រហាររបស់អ៊ីស្រាអែល ត្រូវចំអគារនៅទីក្រុងហ្កាហ្សាដែលផ្តល់ជាទីទីជម្រកដល់គ្រួសារជម្លៀសខ្លួនក្នុងជំរំ Jabalia នៅព្រឹកថ្ងៃពុធនេះ ដោយបានសម្លាប់សមាជិក គ្រួសារ ១៣នាក់ ។

សមាជិកគ្រួសារមួយនេះ និយាយថា មនុស្ស ៧នាក់ ដែលបានស្លាប់ ត្រូវបានទាញចេញ ហើយមនុស្ស ៦នាក់ទៀត នៅកប់ក្នុងគំនរបាក់បែក ស្របពេលដែលក្រុមជួយសង្រ្គោះព្យាយាមជីកកាត់កម្ទេចកម្ទីដោយដៃ ដើម្បីទាញពួកគេចេញក្រៅ ។

លោក Ramez និងលោក Fadi Abu Nasr ដែលត្រូវជាបងប្អូនបង្កើតនឹងគ្នា បានបាត់បង់ឪពុកម្តាយរបស់ពួកគេ ហើយនិងបងប្អូនបង្កើតផ្សេងទៀត នៅក្នុងការវាយប្រហារមួយនេះ ។

លោក Ramez និយាយថា បេះដូងរបស់ខ្ញុំដាច់ជាចំរៀកអស់ទៅហើយ ខ្ញុំចាប់ផ្តើមយំ ខ្ញុំយំ ពេលកាយរកគាត់ ។ ក្រុមការពារជនស៊ីវិល បានធ្វើដំណើរមកដល់នៅរយៈពេល ៣០នាទី ក្រោយការវាយប្រហារ ។ ពួកយើងនៅតែព្យាយាមកាយរកបងប្រុសរបស់ខ្ញុំនៅទីនេះ រហូតដល់ពួកយើងអាចទាញគាត់ចេញមកក្រៅ ក្រោយរយៈពេល ២ម៉ោង ។

ក្រសួងសុខាភិបាលហ្កាហ្សា និយាយនៅថ្ងៃពុធនេះថា ជនប៉ាឡេស្ទីនជាង ៤២.៤០៩នាក់ ត្រូវបានសម្លាប់ និងមនុស្ស ៩៩.១៥៣នាក់ផ្សេងទៀត បានរងរបួស នៅក្នុងការវាយប្រហាររបស់អ៊ីស្រាអែលលើតំបន់ហ្កាហ្សា ចាប់តាំងពីថ្ងៃទី ៧ ខែតុលា ឆ្នាំ ២០២៣ រហូតមក ៕