វិមានក្រឹមឡាំង នៅថ្ងៃពុធ (ទី១៦ ខែតុលា) បានលើកឡើងថា បណ្តាប្រទេសនៅអឺរ៉ុបជាច្រើន កំពុងចាប់ផ្តើមប្រឈមនឹងការលំបាក នៅពេលដែលពួកគេប្រឹងប្រែងប្រមូលផ្តុំឧស្សាហកម្មយោធារបស់ពួកគេ ដើម្បីត្រៀមសម្រាប់ជួយដល់អ៊ុយក្រែន។

អ្នកនាំពាក្យវិមានក្រឹមឡាំង លោក Dmitry Peskov កំពុងឆ្លើយតបទៅនឹងសំណួរអំពីឧស្សាហកម្មសព្វាវុធរបស់បារាំង និងអាល្លឹម៉ង់ ប៉ុន្តែលោកមិនបានបញ្ចេញឈ្មោះប្រទេសអឺរ៉ុបណាមួយ ដោយខ្លួនឯង ឬនិយាយពីរបៀប ឬមូលហេតុដែលពួកគេកំពុងប្រឹងប្រែងជួយអ៊ុយក្រែននោះទេ។

គួរបញ្ជាក់ថា ប្រធានាធិបតីបារាំង លោក Emmanuel Macron បាននិយាយកាលពីសប្តាហ៍មុនថា ការងារនៅតែបន្តមាន ទាក់ទងនឹងការផ្គត់ផ្គង់យោធា សម្រាប់អ៊ុយក្រែន ខណៈដែលអធិការបតីអាល្លឺម៉ង់ លោក Olaf Scholz បានប្រកាសកញ្ចប់ជំនួយយោធា ១,៤ពាន់លានអឺរ៉ូ (១,៥៣ពាន់លានដុល្លារ) សម្រាប់ទីក្រុងគីវ នៅចុងឆ្នាំ២០២៤។

ពាក់ព័ន្ធនឹងការប្រកាសនោះ លោក Peskov បានលើកឡើងថា នៅតែប្រឈមជាមួយបញ្ហា។ អ្នកនាំពាក្យវិមានក្រឹមឡាំងរូបនេះ បានប្រាប់អ្នកសារព័ត៌មានថា៖ «ការកៀរគរសមត្ថភាព សម្រាប់គោលដៅបណ្ដោះអាសន្ននេះ គឺផ្ទុយទៅនឹងផលប្រយោជន៍នៃការអភិវឌ្ឍសេដ្ឋកិច្ចរបស់ប្រទេសទាំងនេះ ហើយច្បាស់ណាស់ទំហំរបស់ប្រទេសទាំងនេះ មិនត្រូវបានបង្កើតឡើង សម្រាប់កិច្ចខិតខំប្រឹងប្រែងបែបនេះនោះទេ»។

លោកបានបន្ថែមថា៖ «មិនយូរនោះទេ យើងសង្ឃឹមថា ការដឹង ដែលថា ការចំណាយបែបនេះ គឺការខ្ជះខ្ជាយឥតប្រយោជន៍នោះ នឹងលេចឡើងកាន់តែច្បាស់ ហើយនឹងជ្រាបចូលទៅក្នុងស្ថាប័ននយោបាយនៃប្រទេសទាំងនេះកាន់តែច្រើនឡើងៗ»៕