កំពង់ឆ្នាំង ៖ រយៈពេល២ថ្ងៃ គឺថ្ងៃទី១៦និង១៧ ខែតុលា ឆ្នាំ២០២៤នេះ ប្រជាពលរដ្ឋ​ប្រមាណជិ​ត​១​ពាន់​នាក់ទៀត រស់នៅក្នុងស្រុកកំពង់ត្រឡាច ខេត្តកំពង់ឆ្នាំង បានមកពិនិត្យព្យាបាលជម្ងឺ ដែល​ក្រុម​គ្រូ​ពេទ្យនៃមន្ទីរសុខាភិបាលខេត្ត បានចុះទៅពិនិត្យព្យាបាលដល់មូលដ្ឋាន និងបាន​សម្ដែង​ការអរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបានយចិត្ត​ទុក​ដាក់​​លើ​សុខុមាល​ភាព​ប្រជាពលរដ្ឋនៅមូលដ្ឋានគ្រប់ទីកន្លែង និងគ្រប់ពេលវេលា ដើម្បីធានាបាន​នូវ​សុខុមាលភាពនៅក្នុងសង្គមអោយកាន់តែមានភាពប្រសើរឡើង ។

លោកវេជ្ជបណ្ឌិត ប្រាក់ វ៉ុន បានឱ្យដឹងថា នៅថ្ងៃនេះ ក្រុមគ្រូពេទ្យជំនាញ នៃ​មន្ទីរ​សុខាភិបាល​ខេត្ត​កំពង់ឆ្នាំង រួមនឹងរថយន្តគ្លីនិក ដែលភ្ជាប់ជាមួយឧបករណ៍បរិក្ខាពេទ្យទំនើប បាន​ចុះ​មក​ពិនិត្យ និង​ព្យាបាលជំងឺជូនប្រជាពលរដ្ឋដោយឥតគិតថ្លៃ ជាពិសេសពិនិត្យលើជម្ងឺរបេង ឡើង​ជាតិ​ស្ក និងជំងឺ​ឡើងឈាម ។ ការនាំយកនូវសេវាសុខាភិបាលមកដល់មូលដ្ឋានបែបនេះ គឺ​ដើម្បី​ចូល​រួម​លើកកម្ពស់សុខមាលប្រជាពលរដ្ឋឱ្យកាន់តែប្រសើរឡើង ។ ការផ្តល់​សេវា​សុខា​ភិបាល​នៅ​តាម​មូល​ដ្ឋានបែបនេះ គឺជាលើកទី៣២ហើយក្នុងឆ្នាំ២០២៤នេះ ក្រុមគ្រូពេទ្យ​ជំនាញ​នៃ​មន្ទីរ​សុខាភិបាល​ខេត្តបានចុះជួបប្រជាពលរដ្ឋតាមមូលដ្ឋានដែលមានជំងឺ ដូចជា​នៅ​តាម​មណ្ឌល​សុខភាព មន្ទីរពេទ្យបង្អែកស្រុកប្រតិបត្តិ ដើម្បីផ្តល់នូវ​ភាពងាយ​ស្រួលប​ន្ថែម​ទៀត​ជូន​ប្រជា​ពលរដ្ឋ​ធ្វើ​យ៉ាង​ណាឱ្យសុខភាពពួកគាត់កាន់តែភាពប្រសើរឡើងថែមទៀត និងបាន​ចូល​រួម​កាត់​បន្ថយ​ជា​មួយ​ការចំណាយរបស់បងប្អូនផងដែរ។

តំណាងប្រជាពលរដ្ឋបានអោយដឹងថា៖ ពួកគាត់ពិតជាសប្បាយចិត្តណាស់ ក្រោយ​ឃើញ​វត្ត​មាន​របស់​ក្រុម​គ្រូពេទ្យជំនាញនៃមន្ទីរសុខាភិបាលខេត្តកំពង់ឆ្នាំង ដែលដឹកនាំដោយលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង, ចុះមកពិនិត្យ​ព្យាបាល​ជូន​ប្រជា​ពលរដ្ឋ​ដល់​មូល​ដ្ឋាន​បែ​បនេះ ដោយមិនគិតសេវា ពេលវេលា ឬប្រាក់កម្រៃអ្វីឡើយ។ ការចុះ​មក​ពិនិត្យ​ព្យាបាល​ជូន​ប្រជាពលរដ្ឋបែបនេះ គឺប្រជាពលរដ្ឋទាំងអស់ទទួលបានប្រយោជន៍ច្រើនណាស់ គឺ​មិន​ចាំ​បាច់​ចំណាយថវិការក្នុងការធ្វើដំណើរទៅកាន់មន្ទីរពេទ្យ មិនបាច់ធ្វើដំណើរ​ឆ្លង​កាត់​គ្រោះ​ថ្នាក់​តាម​ផ្លូវ មិនបាច់ចំណាយថវិការលើថ្នាំសង្កូវ និងបានប្រាស្រ័យ​ទាក់​ទង​គ្នា​ល្អ​ជាមួយ​ក្រុម​គ្រូ​ពេទ្យ​ទាំង​អស់​ទៀតផង។ ក្នុងនាមប្រជាពលរដ្ឋ សុំថ្លែងអំណរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រី, ឯកឧត្តម ស៊ុន សុវណ្ណារិទ្ធិ អភិបាលខេត្ត, លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាល ដែលបាន​យក​ចិត្ត​ទុកដាក់​ដល់​សុខុមាល​ភាព​ប្រជាពលរដ្ឋ​នៅ​តាម​មូល​ដ្ឋាន​ជន​បទ​បែបនេះ៕ កាំង ហុងវាស្នា