ប្រព័ន្ធផ្សព្វផ្សាយរដ្ឋកូរ៉េខាងជើង KCNA បាននិយាយនៅថ្ងៃព្រហស្បតិ៍សប្ដាហ៍នេះថា ផ្លូវថ្នល់ និងផ្លូវដែករបស់ខ្លួនដែលតភ្ជាប់ទៅកូរ៉េខាងត្បូង ត្រូវបានបិទទាំងស្រុង ស្របតាមរដ្ឋធម្មនុញ្ញរបស់ខ្លួនដែលកំណត់យ៉ាងច្បាស់ថា កូរ៉េខាងត្បូងជារដ្ឋអរិភាព ដោយលើកឡើងពីលទ្ធភាពដែលច្បាប់កំពូលនេះ ត្រូវបានកែសម្រួល។

របាយការណ៍របស់ទីភ្នាក់ងារសារព័ត៌មានកណ្ដាលកូរ៉េខាងជើងខាងលើបានធ្វើឡើង ខណៈ យោធាកូរ៉េខាងត្បូងបានបញ្ជាក់កាលពីថ្ងៃអង្គារថា កូរ៉េខាងជើងបានបំផ្ទុះផ្នែកមួយចំនួននៃផ្លូវអន្តរកូរ៉េនៅម្ខាងនៃព្រំដែនរបស់ខ្លួន ដោយបំផ្លាញនូវអ្វីដែលធ្លាប់ជានិមិត្តរូបនៃកិច្ចសហប្រតិបត្តិការរបស់កូរ៉េទាំងពីរ។

សារព័ត៌មានរដ្ឋ KCNA បាននិយាយការបំផ្ទុះផ្នែកខ្លះនៃផ្លូវថ្នល់ និងផ្លូវរថភ្លើងគឺជាវិធានការស្របច្បាប់ ដែលធ្វើឡើងស្របតាមរដ្ឋធម្មនុញ្ញរបស់ប្រទេសកូរ៉េខាងជើង ដោយសារស្ថានភាពសន្តិសុខធ្ងន់ធ្ងរដែលកំពុងបន្តស្ថិតនៅមាត់ជ្រោះនៃសង្រ្គាមដែលមិនអាចទាយទុកមុនបាន ស្របពេលការបង្កហេតុខាងនយោបាយ និងយោធាដ៏ធ្ងន់ធ្ងររបស់កងកម្លាំងអរិភាព។

ទីភ្នាក់ងារសារព័ត៌មានដដែលនោះបានបន្ថែមថា ទីក្រុងព្យុងយ៉ាងនឹងបន្តចាត់វិធានការដើម្បីពង្រឹងជាអចិន្ត្រៃយ៍នូវព្រំដែនភាគខាងត្បូងដែលត្រូវបានបិទ។

កូរ៉េខាងជើងបានកោះប្រជុំសភាប្រជាជនជាន់ខ្ពស់ ដែលជាស្ថាប័ននីតិប្បញ្ញត្តិកំពូលរបស់ខ្លួនកាលពីសប្តាហ៍មុន ដើម្បីកែប្រែរដ្ឋធម្មនុញ្ញ ប៉ុន្តែ KCNA ពុំបាននិយាយអំពីការផ្លាស់ប្តូរបែបណា ទេ ភ្លាមៗ បន្ទាប់ពីការប្រមូលផ្តុំនោះ៕